Búgin Talǵar qalasynda «Dala Qyrandary» jastar qoǵamdyq birlestigi men Sportshylar keńesi sport pen ekologiialyq bastamany urpaqtar sabaqtastyǵymen ushtastyrǵan aýqymdy respýblikalyq «Jattyǵý» jobasyn bastady, dep habarlaidy dalanews.kz.
Astana men Almatydan Talǵarǵa «Dala Qyrandary» qoǵamdyq birlestiginiń bir top azamaty keldi. Olar «Ádilet» partiiasynyń 2026–2031 jyldarǵa arnalǵan baǵdarlamasynda kózdelgen aýlalardy abattandyrý, qaýipsiz qalalyq orta qalyptastyrý jáne buqaralyq sportty damytý jónindegi mindetterdi júzege asyrýǵa kiristi.
Endi «Jattyǵý» naýqany aiasynda respýblikadaǵy aýla sport alańdary «Dala Qyrandary» jasaqtarynyń qamqorlyǵyna alynady.
Naýqannyń negizgi seriktesi – Qazaqstannyń Sportshylar keńesi. Keńes atynan qatysýshylardy grek-rim kúresinen Olimpiada chempiony Iýrii Melnichenko quttyqtady.
– Men úshin búgingi kezdesý óte mańyzdy. Bala kezimde osyndai is-sharalarǵa qatysyp, sportqa qyzyǵa bastadym. Úiirmelerge baryp, nátijesinde kúresti tańdadym jáne belgili bir jetistikterge jettim, – dedi sportshy.
Onyń aitýynsha, bul joly ol aktsiiaǵa nusqaýshy retinde qatysyp, balalar men jastardy sportqa jáne salaýatty ómir saltyna baýlýǵa atsalysyp otyr.
– Kóptegen uly chempionnyń joly úidiń janyndaǵy qarapaiym kermeden bastalǵan. Eger jasóspirimniń janynan der kezinde tálimger, jaramdy sporttyq qural men durys orta tabylsa, deni saý, fizikalyq turǵydan myqty urpaq jáne ulttyq sporttyń qýatty rezervi qalyptasatynyna senimdimin. Búgingi sharanyń otandasymyz, tennisshi Elena Rybakinanyń álemniń birinshi raketkasy atanýymen tuspa-tus kelýi de erekshe mánge ie. Bul – shynymen de zor jetistik! Barlyq balaǵa dene shynyqtyrý men belsendi ómir salty arqyly ózine qyzyqty sport túrin tańdap, Elena sekildi juldyzdardy úlgi tutyp, naǵyz kásibi sportshy bolýdy tileimin. Alǵa, Qazaqstan! – dedi Iýrii Melnichenko.
Aktsiia barysynda kásibi nusqaýshylardyń qatysýymen jalpy dene qyzdyrý jattyǵýlary men jattyǵý sabaqtary ótkizildi. Sondai-aq vorkaýt jáne bastapqy dene daiyndyǵy boiynsha sheberlik saǵattary men shaǵyn týrnirler uiymdastyryldy. Balalar men jasóspirimderge kóshedegi sporttyq quraldardy durys paidalaný tehnikasy úiretildi.
Bir saǵattyń ishinde qalalyq sport alańynyń kelbeti ózgerdi. Alań men kógaldar qoqystan tazartylyp, qossyryqtar men kermeler boialdy, usaq aqaýlar jóndelip, jas kóshetter otyrǵyzyldy.
Belsendilerge jaqyn mańdaǵy úilerdiń turǵyndary da kómektesti. Olardyń kóbi balalarymen birge kelgen. Turǵyndarmen alańdaǵy tártipti saqtaý erejeleri jáne aldaǵy tegin jattyǵýlardyń kestesi talqylandy.
– Bizdiń «Jattyǵý» baǵdarlamamyz jastardy ózine tartatyn jaǵymdy ári durys ortany qalyptastyrady. Munda salaýatty ómir salty sóz júzinde ǵana emes, naqty ispen kórsetiledi. Aktsiiamyz Prezidenttiń «Taza Qazaqstan» bastamasyn da qoldaidy. Biz bir rettik senbilik ótkizýmen shektelmeimiz – eldegi sport alańdaryn turaqty túrde qamqorlyǵymyzǵa alamyz, – dedi «Dala Qyrandary» jastar qoǵamdyq birlestiginiń úilestirýshisi Damir Bekbosynov.
Onyń sózinshe, bastama bir rettik jóndeýden áldeqaida aýqymdy. Uiym sport quraldarynyń tehnikalyq jaǵdaiy men tazalyǵyn baqylaýdy, turaqty tegin jattyǵýlar jáne jergilikti týrnirler ótkizýdi josparlap otyr.
– Jobanyń maqsaty – aýlalarda salaýatty orta qalyptastyryp, turǵyndardy biriktirý arqyly sintetikalyq esirtki, alkogol jáne vandalizm máselelerimen kúresý. Búgin munda uiymymyzdyń júzge jýyq belsendisi men dosy jinalyp, sport alańyn birge retke keltirdi. Óitkeni tártip – qaýipsizdik pen paidaly ádetterdi qalyptastyrýdyń alǵashqy qadamy. Bizdiń maqsatymyz kerme nemese sport quraldaryn jóndeýmen ǵana shektelmeidi. Óz aýlasyna jaýapkershilikpen qaraityn turǵyndar men jastardyń turaqty qaýymdastyǵyn qalyptastyramyz, – dedi Damir Bekbosynov.
Ol aktsiianyń apta saiyn Qazaqstannyń 30-ǵa jýyq qalasyn qamtitynyn atap ótti. Joba ashyq birlesken jattyǵýlar men qoǵamdyq oryndarǵa uqypty qaraýdy qala ómiriniń turaqty daǵdysyna ainaldyrýdy kózdeidi.
