Talǵarda bir top jigit óltirip ketken 16 jastaǵy Sherzattyń ápkesi málimdeme jasady, - dep habarlaıdy Dalanews.kz. 

Marqumnyń ápkesi Baqyt Reımovanyń sózinshe, polıseıler tóbeleske qatysýshylardyń bárin áli qamaýǵa almaǵan. Ol quzyrly organdardan kúdiktilerdiń bárin ustap, kórsetýin talap etti.  

"Eger rezonans jasamasaq, bizdi eshkim estimeıdi. İnim áskerı qyzmetker bolǵysy keldi. Qanshama armandary ishinde ózimen birge ketti. Sondaı ókinishti jaǵdaı. Bulaı bolmaýy kerek edi", - deıdi Baqyt Reımova.

Onyń aıtýynsha, Sherzatty kúdiktiler aıýandyqpen óltirgen. Qansyrap jatqanynda kúdiktilerdiń bireýi artynan kelip, avtomatpen urǵan eken. 

"16 jasar balany anasynyń kózinshe aıýandyqpen óltirdi. Qansyrap jatqanynda bireýi artynan kelip, avtomatpen urǵan. Máıitti óz kózimmen kórdim. Balanyń basy qaq aıyrylyp ketken. 30-ǵa kelgen erkekter 16-daǵy jasóspirimge jabylǵan. Ákesin sabap, baýyrymdy úsh jerden pyshaqtap ketken. Bir syra bermegeni úshin óldi. Masqara ǵoı. Ákesine qorǵan bolǵany úshin óltirip ketti. Endi olardy nege shyǵaryp jiberedi? Ádildik qaıda? Qaı memlekette ómir súrip jatyrmyz? Osylaı bizdiń balalarymyz ólip kete bere me? Bul ne degen sumdyq?", - deıdi marqumnyń ápkesi.

Sherzattyń týystary keminde 13 kúdikti baryn aıtady. Alaıda polısıa 7 adamdy ǵana ustapty. Oqıǵa ornynda bolǵan Sherzattyń ákesi de málimdeme jasady. Ol ádil sot talap etti.

Almaty oblysynyń polısıasy jasóspirimniń ólimine qatysty qylmystyq is qozǵady.

"Kisi óltirý faktisi boıynsha polısıa qylmystyq is qozǵady. Oqıǵanyń barlyq qatysýshysy ustalyp, ýaqytsha ustaý ızolátoryna qamaldy. Qylmystyq isti tergeý oblystyq Polısıa departamenti basshylyǵynyń erekshe baqylaýynda", — delingen resmı jaýapta.

Tóbeleske qatysqan Sherzattyń aǵasyna úsh ret pyshaq salǵany belgili boldy. Qazir er adam aýrýhanada em qabyldap jatyr.

Aıta keteıik, Sherzattyń ákesi jalǵa dúken alyp, saýda jasaýmen aınalysatyn. Arty ólimmen aıaqtalǵan tóbeles osy dúkennen bastalǵan.

Bir jigit dúkenge kelip, bir quty syra alyp, aqshasyn tólemeı kete barǵan. Sherzattyń ákesi syranyń aqshasyn tóleýdi talap etken kezde janjal týyndaǵan.

Sherzat osy sátte klıenttiń dúkennen shyǵyp ketýin suraǵan. Biraq syra alǵan jigit dostaryna qońyraý soǵyp, dúkenge úsh kólikpen bir top jigit kelgen. 

Bir top jigit Sherzatty tepkileı bastaǵan. Bul sátti turǵyndar vıdeoǵa túsirip alǵan. 10-shy synypta oqıtyn Sherzat ata-anasynyń dúkenine kezdeısoq kelgen. Sýyq qarýmen kelgen buzaqylar eshkimdi aıamapty. Qansyraǵan bir otbasynyń músheleri aýrýhanaǵa jetkizilgen. Kóp uzamaı Sherzat jansaqtaý bóliminde kóz jumǵan.