Talǵar ózeniniń jaǵalaýyn bekitý jumystaryna da kóńil bólindi
Qanat Bozymbaev qurylysy shamamen 99% aiaqtalǵan 1200 oryndyq mektepke bardy.
– Mektep zamanaýi, biraq tym aýqymdy. Ǵimarattyń paidaly alańyn tiimdi qoldaný kerek. Aldaǵy ýaqytta qurylys jáne bilim basqarmalaryna birlesip, salynatyn mektepterdiń tiptik úlgisin ázirleýdi tapsyramyn. Mektepterdiń qurylysyna investorlardy da tartý kerek, – dedi Qanat Bozymbaev.
Sondai-aq oblys ákimi «Nurly jer» baǵdarlamasymen salynatyn «Jańa» shaǵyn aýdannyń qurylysy jobasymen tanysty. Mundaǵy halyqtyń boljamdy sanyn eskere otyryp, áleýmettik nysandardyń turǵyndarǵa qoljetimdi bolýyn qarastyrý kerektigin eskertti.
Osy kúni Talǵar ózeniniń jaǵalaýyn bekitý jumystaryna da kóńil bólindi.
Aýdandy sýaratyn sýmen qamtý da – mańyzdy másele. 13 shaqyrymǵa sozylǵan magistraldy kanalǵa kúrdeli jóndeý qajet. Bul kanal shamamen 3 aýdandy qamtidy, onyń tozyǵy jetkendikten qazir sýdyń 40%-y ysyrap bolýda. Qaýipsizdik úshin kanaldyń betin jabý kerek.
– Shyǵyny az zamanaýi materialdardy paidalanyńyzdar. Kúrdeli jóndeý júrgizýdiń aldynda jobanyń tiimdiligi jónindegi esepteýlerdi kórsetińizder. Qazirgi kezde kanaldyń qamtityn sýarý alqabynyń kólemi men jóndeýden keiingi qamtityn aýqymy qandai bolady, josparlanyp otyrǵan kúrdeli jóndeý qandai naqty nátije beredi, sonyń bári aiqyn bolýy kerek. Sodan keiin ǵana naqty sheshim qabyldaityn bolamyz, – dedi Qanat Bozymbaev.
Osy kúni Qanat Aldabergenuly «Baimene» JShS-da boldy. Seriktestik basshysy Evgenii Qambarovtyń aitýynsha, kásiporynnyń 70 ga intensivti alma baǵy bar jáne ol jemisti uzaq ýaqyt saqtaýmen jáne óńdeýmen ainalysady. Kalibrleýge arnalǵan irikteý jáne almany qaptaý jelisi, tabiǵi alma shyryny men ezbesin daiyndaý óndirisi bar. Sol siiaqty 5100 tonna ónim siiatyn jemis saqtaý qoimasy bar. Zamanaýi qural-jabdyqtardyń arqasynda kásiporyn 1 kg almadan 65-70% taza shyryn shyǵarady, al eki márte pasterleýdiń nátijesinde shyrynda konservanttar qospai-aq almanyń barlyq paidaly qasietteri saqtalady. Alma men shyryn Almaty naryǵynda, iri saýda jelilerinde «Alem Alma» brendimen saýdalanady. Bolashaqta alma shyrynynyń sharaby, djem, alma sirke sýy, gazdy sýsyndar jáne basqa da ónim shyǵarý, baq aýmaǵyn 40 gektarǵa ulǵaitý josparda bar. Joba tolyq iske qosylǵanda tartylatyn investitsiia kólemi 6,1 mlrd. teńgege jetedi.
Sapar sońynda aýdan aktivimen kezdesken Qanat Bozymbaev birneshe jyl boiy sheshilmei kele jatqan máselelerge nazar aýdardy. Olardyń qatarynda sýmen, gazben, turǵyn úimen qamtý, saiajai massivterinde infraqurylymnyń joqtyǵy, jer ýchaskesi kezegi, úsh aýysymdy mektepterdi joiý, jol apattarynyń aldyn alý jáne t.b. bar.
– Búgin aýdannyń áleýmettik-ekonomikalyq damýymen tanystym, birqatar nysandardy araladym. Aýdan úlken, halyq tyǵyz ornalasqan, problema kóp. Ásirese, irrigatsiialyq júielerdi qalpyna keltirýge erekshe kóńil bólý kerek. Saiajai massivteriniń egjei-tegjeili josparyn jáne olardy keshendi damytýdyń josparyn ázirleýdi tapsyramyn. Sybailas jemqorlyqpen kúres eń birinshi kezekte turýy tiis. Óz jumystaryńyzda Prezidenttiń «Halyq únine qulaq asatyn memleket» tujyrymdamasyn únemi basshylyqqa alyńyzdar. Áleýmettik jelide turǵyndardyń ótinishterin nazardan tys qaldyrmai, túsken suraqtarǵa qarapaiym, túsinikti túrde jaýap berińizder. Jeke azamattardy qabyldaýdy turaqty ótkizip, halyqpen tildesińizder. Árine, biz búgin barlyq problemany túgel qamtydyq dei almaimyz. Biraq eń bastysy ózekti máselelerdi sheshý joldaryn aiqyndap aldyq. Olardy budan ári jumys barysynda birlesip iske asyratyn bolamyz, – dedi Qanat Bozymbaev.
