«Ádep-quqyqtyq jumys jónindegi mentor» jobalyq keńsesi oblystyq qoǵamdyq damý basqarmasynyń bazasynda qurylǵan. Basqarmanyń málimetine qaraǵanda, oblys ortalyǵynyń árbir mektebinde pedagogika, psihologiia, quqyq salasynda bilimi bar, sondai-aq biliktilik talaptaryna sáikes keletin, arnaiy oqý kýrsynan ótken mamandar mentorlyq qyzmetti júzege asyrady. Ár mektepte 1 mamannan, barlyǵy 30 adam jumys isteidi.
– Qazirgi ýaqytta qalalyq mektepterdiń oqýshylary mentor mamannyń kim ekenin, oǵan senýge jáne ózin alańdatqan máselelerin aityp, oi bólisýine bolatynyn biledi. Mentor keńes beredi, baǵyttaidy, máseleni sheshý joldaryn usynady, qajet bolǵan jaǵdaida ártúrli qyzmet salalarynyń mamandaryn tartady. Osylaisha, mentorlar mektep, ata-ana, jalpy qoǵam men balalar arasynda erekshe kópir bolyp otyr, – deidi «Ádep-quqyqtyq jumys jónindegi mentor» jobalyq keńsesiniń jumysyna jetekshilik etetin oblystyq Qoǵamdyq damý basqarmasy basshysynyń orynbasary Iliias Tústikbaev.
Onyń aitýynsha, qazan aiynda mentorlardyń qatysýymen «Qaýipsizdik jáne quqyq buzýshylyqtyń aldyn alý» ailyǵy ótti, al qarasha aiynda «Bilim berý» ailyǵy ótedi dep josparlanyp otyr.
Osyǵan bailanysty jelilik kestege sáikes Taldyqorǵan qalasynyń oqýshylary men muǵalimderine Politsiia departamentiniń ekstremizmge qarsy kúres, esirtkige qarsy kúres bólimderiniń, Taldyqorǵan qalalyq №1 emhananyń mamandarymen birlesip, dárister ótkiziledi.
Sonymen qatar shaqyrylǵan lektorlardyń qatysýymen arnaiy áńgimelesýler ótkizý josparlanǵan. Mysaly, joba engizile bastaǵannan bastap oqýshylarǵa QR Ǵylym jáne joǵary bilim ministri Saiasat Nurbektiń, oblys prokýrory Madiiar Basshybaevtyń, «Ulttyq eriktiler jelisi» ZTB atqarýshy direktory Tatiana Mironiýktiń, dintanýshy, teolog, psiholog Nurlan Asanovtyń, «Qazaqstan stýdentter aliansy» respýblikalyq stýdentter qozǵalysy» QB tóraǵasy Ulan Náýkenniń, shyǵystanýshy, «Otbasy hrestomatiiasy» jobasynyń jetekshisi, «Qýyskeýde» kitabynyń avtory Sanjar Kerimbaidyń dáristeri uiymdastyryldy. Al 1-3 qarasha aralyǵynda 225 oqýshyǵa SDU, QBTÝ, QazUÝ, QazUPÝ, Narxoz, QazUMÝ jáne elimizdiń ózge de úzdik joǵary oqý oryndaryna kásibi baǵdarlaý ekskýrsiialary josparlanǵan.
Jasóspirimder tárbiesiniń ózektiligin eskere otyryp, jobalyq keńse óz jumysynda balalar men jasóspirimderdiń quqyqtary men mindetterin túsindirý, nashaqorlyqtyń, lýdomaniianyń, sýitsidtiń, býllingtiń, kiberbýllingtiń, zorlyq-zombylyqtyń barlyq túrleriniń aldyn alý, jynystyq qol suǵylmaýshylyqty qalyptastyrý (erte júktiliktiń aldyn alý), salaýatty ómir saltyn nasihattaý, mamandyq tańdaý jáne kásiptik baǵdar berý, sonymen qatar shyǵarmashylyq oilaýdy damytý jáne qarjylyq saýattylyqty arttyrý baǵyttaryn negizge alýda.
Fotosýretterdi «Ádep-quqyqtyq jumys jónindegi mentor» jobalyq keńsesi usyndy.
