«Almaty - Taldyqorǵan» gaz qubyry men avtomattandyrylǵan gaz bólý stantsiiasynyń qurylysy Memleket basshysynyń tapsyrmasymen júrgizilip, jumys barysy oblys ákimi A. Batalovtyń tikelei baqylaýynda boldy. Tabiǵi gazdy tutynýshyǵa neǵurlym jyldam jetkizý úshin Taldyqorǵanda búgingi kúni gazben qamtý jelilerin ornatý jumystary qatar júrgizilýde. Qazirgi kezde alǵashqy 10 úi kógildir otynnyń igiligin kóre bastady. Taǵy 100 turǵyn úi gazǵa qosylýǵa daiyn jáne bul kórsetkish kúnnen kúnge artyp keledi. Ekonomikalyq jáne ekologiialyq tiimdi bul otyn túri endigi jerde turǵyndardy kómir men otynǵa táýeldilikten qutqaryp, turmysqa qolaily jaǵdai týǵyzbaq.
Taldyqorǵan qalasy Aqbastaý kóshesiniń turǵyny Gaýhar Ydyrysova -alǵashqy bolyp tabiǵi gazǵa qosylǵan úi ieleriniń biri.
- Qalaǵa, onyń ishinde bizdiń kóshege tabiǵi gaz qosylatynyn estigende qatty qýandym. Bul bizdiń óńirimizdiń jetistigi dep bilemin. Kógildir otynmen birge úige jylý men bereke kiredi. Oshaqtyń otyn jaǵyp otyrǵan áiel ana úshin bul - úlken qýanysh, - dedi G. Ydyrysova.
«Almaty - Taldyqorǵan» magistraldy gaz qubyry óńirdiń eń iri ári asa mańyzdy áleýmettik jobalarynyń biri. Ony júzege asyrýǵa 21,4 mlrd. teńge bólingen. Magistraldy gaz qubyry oblys ortalyǵyn qosqanda jalpy 410 myń turǵyny bar 3 qala men 6 aýdandy kógildir otynmen qamtýǵa múmkindik beredi.
Jalpy, Almaty oblysyn gazdandyrý Respýblikalyq gazdandyrý júiesiniń sheńberinde júrgizilýde. Óńirde barlyǵy 741 eldi mekende 2 mln. halyq tursa, sonyń 1,4 mln. halyq turatyn 473 eldi mekeni gazdandyrýǵa jatady. Máselen, 2014 jyly oblysty gazdandyrý deńgeii 73 eldi mekendi qamtyp, 14 % qurasa, búgingi kúni 108 eldi mekenge jetkizilip, 23 %-ǵa kóterildi. Biylǵy jyly bul kórsetkishti 26 %-ǵa jetkizip, 123 eldi mekendi gazben qamtý josparlanǵan. Osy maqsatta biýdjet qarjysymen qosa jeke investitsiia da tartylýda. Jalpy Jetisý óńirinde turǵyndarynyń sany 1,4 mln. adam bolatyn 9 aýdan – Jambyl, Qarasai, Talǵar, Ile, Eńbekshiqazaq, Uiǵyr, Panfilov, Kóksý, Eskeldi jáne 3 qala – Taldyqorǵan, Tekeli, Qapshaǵai gazdandyrylyp jatyr.
