«الماتى - تالدىقورعان» گاز قۇبىرى مەن اۆتوماتتاندىرىلعان گاز ءبولۋ ستانسياسىنىڭ قۇرىلىسى مەملەكەت باسشىسىنىڭ تاپسىرماسىمەن جۇرگىزىلىپ، جۇمىس بارىسى وبلىس اكىمى ا. باتالوۆتىڭ تىكەلەي باقىلاۋىندا بولدى. تابيعي گازدى تۇتىنۋشىعا نەعۇرلىم جىلدام جەتكىزۋ ءۇشىن تالدىقورعاندا بۇگىنگى كۇنى گازبەن قامتۋ جەلىلەرىن ورناتۋ جۇمىستارى قاتار جۇرگىزىلۋدە. قازىرگى كەزدە العاشقى 10 ءۇي كوگىلدىر وتىننىڭ يگىلىگىن كورە باستادى. تاعى 100 تۇرعىن ءۇي گازعا قوسىلۋعا دايىن جانە بۇل كورسەتكىش كۇننەن كۇنگە ارتىپ كەلەدى. ەكونوميكالىق جانە ەكولوگيالىق ءتيىمدى بۇل وتىن ءتۇرى ەندىگى جەردە تۇرعىنداردى كومىر مەن وتىنعا تاۋەلدىلىكتەن قۇتقارىپ، تۇرمىسقا قولايلى جاعداي تۋعىزباق.
تالدىقورعان قالاسى اقباستاۋ كوشەسىنىڭ تۇرعىنى گاۋھار ىدىرىسوۆا -العاشقى بولىپ تابيعي گازعا قوسىلعان ءۇي يەلەرىنىڭ ءبىرى.
- قالاعا، ونىڭ ىشىندە ءبىزدىڭ كوشەگە تابيعي گاز قوسىلاتىنىن ەستىگەندە قاتتى قۋاندىم. بۇل ءبىزدىڭ ءوڭىرىمىزدىڭ جەتىستىگى دەپ بىلەمىن. كوگىلدىر وتىنمەن بىرگە ۇيگە جىلۋ مەن بەرەكە كىرەدى. وشاقتىڭ وتىن جاعىپ وتىرعان ايەل انا ءۇشىن بۇل - ۇلكەن قۋانىش، - دەدى گ. ىدىرىسوۆا.
«الماتى - تالدىقورعان» ماگيسترالدى گاز قۇبىرى ءوڭىردىڭ ەڭ ءىرى ءارى اسا ماڭىزدى الەۋمەتتىك جوبالارىنىڭ ءبىرى. ونى جۇزەگە اسىرۋعا 21،4 ملرد. تەڭگە بولىنگەن. ماگيسترالدى گاز قۇبىرى وبلىس ورتالىعىن قوسقاندا جالپى 410 مىڭ تۇرعىنى بار 3 قالا مەن 6 اۋداندى كوگىلدىر وتىنمەن قامتۋعا مۇمكىندىك بەرەدى.
جالپى، الماتى وبلىسىن گازداندىرۋ رەسپۋبليكالىق گازداندىرۋ جۇيەسىنىڭ شەڭبەرىندە جۇرگىزىلۋدە. وڭىردە بارلىعى 741 ەلدى مەكەندە 2 ملن. حالىق تۇرسا، سونىڭ 1،4 ملن. حالىق تۇراتىن 473 ەلدى مەكەنى گازداندىرۋعا جاتادى. ماسەلەن، 2014 جىلى وبلىستى گازداندىرۋ دەڭگەيى 73 ەلدى مەكەندى قامتىپ، 14 % قۇراسا، بۇگىنگى كۇنى 108 ەلدى مەكەنگە جەتكىزىلىپ، 23 %-عا كوتەرىلدى. بيىلعى جىلى بۇل كورسەتكىشتى 26 %-عا جەتكىزىپ، 123 ەلدى مەكەندى گازبەن قامتۋ جوسپارلانعان. وسى ماقساتتا بيۋدجەت قارجىسىمەن قوسا جەكە ينۆەستيسيا دا تارتىلۋدا. جالپى جەتىسۋ وڭىرىندە تۇرعىندارىنىڭ سانى 1،4 ملن. ادام بولاتىن 9 اۋدان – جامبىل، قاراساي، تالعار، ىلە، ەڭبەكشىقازاق، ۇيعىر، پانفيلوۆ، كوكسۋ، ەسكەلدى جانە 3 قالا – تالدىقورعان، تەكەلى، قاپشاعاي گازداندىرىلىپ جاتىر.
