Taldyqorǵandyqtar kitap oqýdy qolǵa almaq
«Jetisý – kitapqumarlar ólkesi» atty «Býkkrossing» jobasynyń saltanatty túrde ashylý sharasy Jastar parkindegi M.Maqataev eskertkishi aldynda ótti.
Atalǵan sharany Almaty oblystyq tilderdi damytý jónindegi basqarmasynyń basshysy Aidar Bashbaev ashyp, Elbasymyz Nursultan Ábishuly Nazarbaevtyń «Bolashaqqa baǵdar: rýhani jańǵyrý» baǵdarlamasy aiasynda júzege asyrylyp otyrǵan «Býkkrossing" jobasynyń mańyzy men máni jaiynda aityp ótti.
–«Jańǵyrýǵa degen ishki umtylys – bizdiń damýymyzdyń eń basty qaǵidasy. Ómir súrý úshin ózgere bilý kerek», dep Elbasymyz aitqandai, sanany jańǵyrtýmen qatar ishki jan dúnieni ózgertýdi árkim ózinen bastaýy qajet. Bul jerde kitaptyń da áseri mol. Sebebi, kitap oqýdy qoiǵan adam – oilaýdy da qoiady. Sondyqtan qalamyzdyń halyq kóp jinalatyn oryndarynda kitap sóreleri jasalyp, oǵan álem jáne qazaq ádebieti klassikteriniń eńbekteri men balalar ádebietine qatysty kitaptar qoiylyp otyr. Kez-kelgen oqyrman osy kitap sórelerinen ózin qyzyqtyratyn oqýlyqtardy tegin alyp, oqýyna, sonymen qatar unatqan kitabyn jeke kitaphanalaryndaǵy kitappen almastyrýlaryna bolady.
Kitapqa ońai qol jetkizý maqsatynda ázirge qalamyzda Arbat boiynda, Jastar parkinde jáne Qaratal ózeniniń jaǵalaýynda kóshpeli kitaphana ornalastyrylylady. Al usynylǵan kitap sany 600-ge jýyq, – dedi Aidar Karbozuly.
Osyndai jyly sózden keiin «Jetisý» gazetiniń bas redaktory Ámire Árin men «Kásipker» jýrnalynyń bas direktory Gúljiian Súleimenova ashylý saltanatynyń lentasyn qiyp, jobaǵa qoldaý bildirdi.
«Alash» syilyǵynyń iegeri, aqyn Ámire Árin atalǵan jobanyń jas urpaqtyń keleshegi úshin úlken mánge ie ekendigin aitty. «Qai zamanda da, qai memlekette de bilimdi adam – qoǵamnyń qozǵaýshysy bolǵan. Elbasymyz Nursultan Ábishuly Nazarbaevtyń aitqany bar: «Dańqty ata-babalarymyz myńdaǵan jyl boiy uly Eýraziia keńistiginde órkeniettiń integratory bolǵan». Ulanǵaiyr dalamyzda álemdegi eń alǵashqy álipbi paida bolǵan. Tarihi tastardaǵy bitik jazýy – sonyń kýási. Álbette, bul sharaǵa ujym bolyp, aýyl-aimaq bolyp atsalysýymyz qajet», – dei kele ol jobaǵa degen shyn rizashylyǵyn bildirdi.
Al «Kásipker» jýrnalynyń bas direktory Gúljiian Maǵdanqyzy urpaqqa qaldyrar eń úlken mura – kitap ekendigin, ótkenniń rýhy, keleshektiń kilti, mádeniettiń biik shyńy da osy kitapta jatqandyǵyn aityp, jastardy kitap oqýǵa, sol arqyly bilimderin jetildirýge shaqyrdy.
Kitap almasý sharasy aiasynda oblystyq «Jetisý» gazetiniń jas tilshileri Eńlik Baýyrjan, Aidar Qaliev, Muhtar Kúmisbek jyrdan shashý shashty.
Kitap oqýǵa tartýdyń keremet tásili bolyp tabylatyn «Býkkrossing» aktsiiasy osyǵan deiin elimizdiń ár aimaǵynda júzege asyrylyp, eldiń qyzyǵýshylyǵyn oiatqan bolatyn. Taldyqalada bastaý alǵan joba da halyqtyń kitapqa degen súisipenshiligin arttyryp, qalamyzda kitapqumarlar sany kóbeie túsedi dep senemiz.
