«جەتىسۋ – كىتاپقۇمارلار ولكەسى» اتتى «بۋككروسسينگ» جوباسىنىڭ سالتاناتتى تۇردە اشىلۋ شاراسى جاستار پاركىندەگى م.ماقاتايەۆ ەسكەرتكىشى الدىندا ءوتتى.
اتالعان شارانى الماتى وبلىستىق تىلدەردى دامىتۋ جونىندەگى باسقارماسىنىڭ باسشىسى ايدار باشبايەۆ اشىپ، ەلباسىمىز نۇرسۇلتان ءابىش ۇلى نازاربايەۆتىڭ «بولاشاققا باعدار: رۋحاني جاڭعىرۋ» باعدارلاماسى اياسىندا جۇزەگە اسىرىلىپ وتىرعان «بۋككروسسينگ" جوباسىنىڭ ماڭىزى مەن ءمانى جايىندا ايتىپ ءوتتى.
–«جاڭعىرۋعا دەگەن ىشكى ۇمتىلىس – ءبىزدىڭ دامۋىمىزدىڭ ەڭ باستى قاعيداسى. ءومىر ءسۇرۋ ءۇشىن وزگەرە ءبىلۋ كەرەك»، دەپ ەلباسىمىز ايتقانداي، سانانى جاڭعىرتۋمەن قاتار ىشكى جان دۇنيەنى وزگەرتۋدى اركىم وزىنەن باستاۋى قاجەت. بۇل جەردە كىتاپتىڭ دا اسەرى مول. سەبەبى، كىتاپ وقۋدى قويعان ادام – ويلاۋدى دا قويادى. سوندىقتان قالامىزدىڭ حالىق كوپ جينالاتىن ورىندارىندا كىتاپ سورەلەرى جاسالىپ، وعان الەم جانە قازاق ادەبيەتى كلاسسيكتەرىنىڭ ەڭبەكتەرى مەن بالالار ادەبيەتىنە قاتىستى كىتاپتار قويىلىپ وتىر. كەز-كەلگەن وقىرمان وسى كىتاپ سورەلەرىنەن ءوزىن قىزىقتىراتىن وقۋلىقتاردى تەگىن الىپ، وقۋىنا، سونىمەن قاتار ۇناتقان كىتابىن جەكە كىتاپحانالارىنداعى كىتاپپەن الماستىرۋلارىنا بولادى.
كىتاپقا وڭاي قول جەتكىزۋ ماقساتىندا ازىرگە قالامىزدا اربات بويىندا، جاستار پاركىندە جانە قاراتال وزەنىنىڭ جاعالاۋىندا كوشپەلى كىتاپحانا ورنالاستىرىلىلادى. ال ۇسىنىلعان كىتاپ سانى 600-گە جۋىق، – دەدى ايدار كاربوز ۇلى.
وسىنداي جىلى سوزدەن كەيىن «جەتىسۋ» گازەتىنىڭ باس رەداكتورى امىرە ءارىن مەن «كاسىپكەر» جۋرنالىنىڭ باس ديرەكتورى گۇلجيان سۇلەيمەنوۆا اشىلۋ سالتاناتىنىڭ لەنتاسىن قيىپ، جوباعا قولداۋ ءبىلدىردى.
«الاش» سىيلىعىنىڭ يەگەرى، اقىن امىرە ءارىن اتالعان جوبانىڭ جاس ۇرپاقتىڭ كەلەشەگى ءۇشىن ۇلكەن مانگە يە ەكەندىگىن ايتتى. «قاي زاماندا دا، قاي مەملەكەتتە دە ءبىلىمدى ادام – قوعامنىڭ قوزعاۋشىسى بولعان. ەلباسىمىز نۇرسۇلتان ءابىش ۇلى نازاربايەۆتىڭ ايتقانى بار: «داڭقتى اتا-بابالارىمىز مىڭداعان جىل بويى ۇلى ەۋرازيا كەڭىستىگىندە وركەنيەتتىڭ ينتەگراتورى بولعان». ۇلانعايىر دالامىزدا الەمدەگى ەڭ العاشقى ءالىپبي پايدا بولعان. تاريحي تاستارداعى بىتىك جازۋى – سونىڭ كۋاسى. البەتتە، بۇل شاراعا ۇجىم بولىپ، اۋىل-ايماق بولىپ اتسالىسۋىمىز قاجەت»، – دەي كەلە ول جوباعا دەگەن شىن ريزاشىلىعىن ءبىلدىردى.
ال «كاسىپكەر» جۋرنالىنىڭ باس ديرەكتورى گۇلجيان ماعدان قىزى ۇرپاققا قالدىرار ەڭ ۇلكەن مۇرا – كىتاپ ەكەندىگىن، وتكەننىڭ رۋحى، كەلەشەكتىڭ كىلتى، مادەنيەتتىڭ بيىك شىڭى دا وسى كىتاپتا جاتقاندىعىن ايتىپ، جاستاردى كىتاپ وقۋعا، سول ارقىلى بىلىمدەرىن جەتىلدىرۋگە شاقىردى.
كىتاپ الماسۋ شاراسى اياسىندا وبلىستىق «جەتىسۋ» گازەتىنىڭ جاس تىلشىلەرى ەڭلىك باۋىرجان، ايدار قالييەۆ، مۇحتار كۇمىسبەك جىردان شاشۋ شاشتى.
كىتاپ وقۋعا تارتۋدىڭ كەرەمەت ءتاسىلى بولىپ تابىلاتىن «بۋككروسسينگ» اكسياسى وسىعان دەيىن ەلىمىزدىڭ ءار ايماعىندا جۇزەگە اسىرىلىپ، ەلدىڭ قىزىعۋشىلىعىن وياتقان بولاتىن. تالدىقالادا باستاۋ العان جوبا دا حالىقتىڭ كىتاپقا دەگەن سۇيسىپەنشىلىگىن ارتتىرىپ، قالامىزدا كىتاپقۇمارلار سانى كوبەيە تۇسەدى دەپ سەنەمىز.
