Taldyqorǵanda regbi boiynsha oblystyq qurama komandalaryn daiyndaý jáne olardyń jarystarǵa qatysýyn qamtamasyz etý úshin biýdjetten 387,9 million teńge bólinbek. Bul soma Qazaqstanda regbige baǵyttalǵan memlekettik qarjylandyrý kólemi boiynsha eń iri kórsetkishterdiń biri, dep habarlaidy Dalanews.kz.
Atalǵan derek memlekettik satyp alý portalynda jariialanǵan konkýrs qujattarynda kórsetilgen.
Memlekettik tapsyrys berýshi – Jetisý oblysynyń dene shynyqtyrý jáne sport basqarmasy. Satyp alý "sporttyq klýbtardyń qyzmet kórsetýi" retinde rásimdelgen.
Qarajat regbi boiynsha oblystyq komandalardyń oqý-jattyǵý protsesin uiymdastyrýǵa, sportshylardy daiyndaýǵa jáne jarystarǵa qatystyrýǵa baǵyttalmaq. Qyzmet kórsetý bir keshendi lot aiasynda júzege asady. Kelisimsharttyń merzimi 2026 jyldyń 31 jeltoqsanyna deiin belgilengen. Qujatta 30 paiyz avanstyq tólem qarastyrylǵan.
Jalpy bólingen soma 387 931 034 teńgeni quraidy. Qarjylandyrý Jetisý oblysy, Taldyqorǵan qalasy aýmaǵynda júzege asyrylady.
Atalǵan sheshim qoǵamda birqatar suraq týyndatyp otyr. Regbi Qazaqstanda damyp kele jatqan sport túri bolǵanymen, ol áli kúnge deiin buqaralyq sport sanatyna tolyq enbegen. Fýtbol, boks, kúres nemese dziýdo sekildi sport túrlerimen salystyrǵanda qatysýshylar sany men kórermen qyzyǵýshylyǵy jaǵynan artta qalady. Osy turǵydan alǵanda, júzdegen million teńgeniń dál osy baǵytqa bólinýi qanshalyqty oryndy degen másele týyndaidy.
Aita ketý kerek, satyp alý ashyq túrde jariialanǵanymen, bólingen qarajattyń naqty qandai shyǵyn baptaryna jumsalatyny konkýrs qujattarynda egjei-tegjeili kórsetilmegen.
