Nysannyń syrtqy pishini erekshe. Basseinniń syrtqy kórinisi balyq silýetine uqsaidy ári Taldyqorǵannyń tórt buryshynan men mundalap kórinedi. Qurylys jumystary karantin ýaqytynda da tolastaǵan joq.
Aldaǵy ýaqytta osynaý keshen qalanyń sáýletine sán kirgizetin, ári jergilikti jurtqa sý sportymen ainalysýǵa múmkindik beretin ortalyqqa ainalmaq.
Ázir qurylys basynda júzdegen jumysshy júr. Basseinniń qabyrǵasyn qalaýda jańa tehnologiialar jáne zamanaýi materialdar paidalanylýda.
Qurylysqa jaýapty "Bazis Construction" buǵan deiin “Almaty-Arena”, Nurly-taý biznes ortalyqtaryn salǵan. Kompaniia ókilderiniń aitýynsha qurylys jumystary shildeniń aiaǵynda tolyq aiaqtalyp, turǵyndar igiligine beriledi.
27 myń sharshy metrdi alyp jatqan aýmaqta bir emes, birneshe bassein ornalasady, onyń ishinde eresekter men balalarǵa arnalǵan basseinder bar, sýǵa sekirip úirengender úshin de jaǵdai jasalady.
Josparǵa sáikes, nysannyń 2 qabaty jáne jertólesi bar. 2 halyqaralyq standartqa sai bassein bolady. Birinshisiniń eni 25, uzyndyǵy 52 metrge sozylmaq. Ol sýǵa júzý jarysyna negizdelgen. Al, ekinshinde 5-ten 10 metrlik biiktikten atletter sýǵa sekirip, úzdikterin anyqtamaq. Sonymen qatar áýesqoilar men balalarǵa arnalǵan bassein de qarastyrylǵan. Ústińgi qabatta 7 sport zal bolady.
Basseinnen bólek bul arada sýǵa júze almaityndarǵa arnalǵan arnaiy "haýyzdar", meditsinalyq mekeme, jattyǵý zaldary, býfet jáne demalysqa qajetti basqa da ortalyqtar ornalasady.
Iaǵni sportshyǵa qajet barlyq jaǵdai qarastyrylǵan. Jobany ázirleý kezinde onyń kóp fýnktsiialyǵyna, yńǵailyǵyna da, estetikalyq kelbetine de kóp kóńil bólingen.
Aita ketelik jobanyń úlgisin syzýǵa Almaty oblysynyń ákimi Amandyq Batalovtyń ózi atsalysty, keiinnen qurylys barysyn jiti baqylap otyrdy. Ákim keshenniń basseinmen ǵana shektelip qalmai, basqa da qyzmet túrlerin qamtýyna nazar aýdardy.
Atap aitar bolsaq bul arada ul-qyzyn sý sportyna baýlyǵysy keletinder úshin arnaiy oqý-jattyǵý zaldary jumys isteidi. Sý doby jáne sýǵa sekirý boiynsha da tájiribeli mamandardan tálim ala alasyz. Al óńirdegi az qamtylǵan otbasylarǵa basseinge jazylýǵa jeńildik jasalady.
Amandyq Batalovtyń tapsyrmasyn basseinniń qurylysyna jaýapty merdiger kompaniiada da buljytpai oryndaýda.
"Sportpen ainalysatyn azamattardyń qaýipsizdigin birinshi kezekti oilaý kerek. Sýǵa sekirýge arnalǵan taqtaisha arnaiy tireýishtermen jasaqtalyp, adamǵa zaqym keltirmeýi tiis" – degen-di aimaq basshysy.
Merdiger kompaniia mamandarynyń aitýynsha biiktigi 5,7 jáne 10 metr quraityn munaralardyń qaýipsizdik deńdeii joǵary.
Al Taldyqorǵan turǵyndary basseinniń ashylýyn asyǵa kútip júr.
"Bassein ashylǵan kúni asyǵyp jetemin. Aldymen qyzymdy akvaerobikaǵa jazdyramyn. Bizdiń qalamyzda mundai deńgeidegi nysannyń paida bolýy búgingi býynnyń sportpen ainalysýǵa qulshynysyn týǵyzary anyq. Bul bassein jas sportshylarǵa jetistigin jaqsartýǵa shabyt syilaidy. Motivatsiia beredi.
Onyń ústine qalamyzdyń sánin kirgizip, kózdiń jaýyn alar keshenniń biri bolady", – deidi Taldyqorǵan turǵyny Baný Kúmisbekqyzy.
Basseinde aýqymdy sporttyq jarystar ótkiziledi. Aimaq basshysy Amandyq Batalovtyń atap ótkenindei bul bassein eń aldymen oblys turǵyndaryna arnap salynýda.
Sýda júzý orny qoldanysqa berilgennen keiin, turǵyndar osy nysanda bos ýaqyttaryn ótkizip, aýqymdy sporttyq saiystardy tamashalaýǵa múmkindik týady.
Aita ketelik halyqaralyq talaptarǵa sai sport kesheniniń qurylysy ótken jyldyń kóktem aiynda bastalǵan.
https://youtu.be/X3yShm75KDU
