Kottedj qalashyǵynyń bekitilgen egjei-tegjeili josparlaý jobasy boiynsha jalpy aýdany 56,6 myń sharshy metr, quny 8,5 mlrd.teńge bolatyn 620 jeke turǵyn úi qurylysy qarastyrylǵan.
Búgingi kúnge deiin aýmaǵy 19,5 myń sharshy metrdi quraityn 228 kottedjge halyq qonystanǵan. Munymen óńir halqyn baspanamen qamtý isi tolastap qalmady. Elimizdiń basty merekesine orai, aýdany 12,3 myń sharshy metr bolatyn 120 úi qoldanysqa berildi.
Atalǵan nysandy salýǵa 887,0 mln teńge qarjy jumsalǵan. El igiligine berilgen bul úiler 12 bólikke bólingen, ár bólimde 4 úi japsarlasa salynǵan. Bul óńir basshylyǵynyń turǵyndarǵa degen qamqorlyǵy.
– Qurmetti taldyqorǵandyqtar, qymbatty qonaqtar, uly merekemiz táýilsizdik meiramy qutty bolsyn! Elbasynyń bastamasymen, Prezidentimiz Qasym-Jomart Kemelulynyń qoldaýymen iske asyrylǵan «Nurly jer» baǵdarlamasy arqyly halyq baspanaly bolyp jatyr. Bul sonyń nátijesi. Eki jylda oblysta kóp ózgeris bolyp, turǵyn úilerdiń qurylysy qarqyndy júrip jatyr. Eki jyl aldy salynǵan úilerdiń aýdany 79 myń sharshy metr bolsa, biyl ol kórsetkish 131 myńǵa jetip otyr. Keler jyly 211 myń sharshy metrden asady degen maqsatymyz bar. Úilerińiz janǵa tolsyn, qýanyshtaryńyz uzaǵynan bolsyn, – dedi quttyqtaý sózinde oblys ákiminiń birinshi orynbasary Lázzat Turlashev.
Jańa úilerge tabiǵi gazǵa qosylǵan. Sondai-aq, sý qubyry ornatylyp, káriz júiesi tartylǵan. Kópshilikke paidalanýǵa berilgen baspananyń qurylysyn «Tehnosnab 2002» JShS júrgizgen. Dál osy kúni qutty shańyraǵyna qol jetkizgenderdiń qatarynda múmkindigi shekteýli jandar men olarǵa qaraýshy azamattar, meditsina qyzmetkerleri, zeinetkerler men turǵyn úi qurlys jinaq bankniń salymshylary jáne tolyq emes otbasylar da bar.
Ulyq meiramnyń qarsańynda jańa úige qonystanýshylardyń biri aq halatty abzal jan, Eldos Smaiylov.
Almaty oblysynda memlekettiń arqasynda úige qoly jetkender tek jankeshti mamandyq ieleri ǵana emes, tolyq emes otbasynyń ókilderi de bar. Óńir órkendesin dese eldiń jaǵdaiy jaqsarýy tiis degen ustanymdy nazarǵa alǵan Jetisý jeriniń basshylyǵy mundai azamattarǵa barynsha qamqorlyq kórsetip keledi.
Bul qatardan qala turǵyny Sholpan Muhamedjanovany da kórýge bolady.
– Búgin aq túieniń qarny jarylǵan kún. Kópten kútken kezegim keldi. Jalǵyz basty anamyn. Kózimniń aǵy men qarasy bolǵan qyzymdy ózim jetkizdim. Qansha qiyndyq bolsa da jaqsylyqtan kúderimdi úzbedim. Búgin sol úmitim aqtaldy. Eliniń erteńi men jai-kúiin oilaǵan memleketimizge rahmet, – dedi óz sózinde.
Aldaǵy ýaqytta da jańa qonystyń kilti tabystalady. Máselen, aǵymdaǵy jyldyń 30 jeltoqsanyna jalpy aýdany 12,2 myń sharshy metr 133 úidi paidalanýǵa berý josparlanǵan. Negizinde biyl jyly aýmaǵy 24,8 myń sharshy metr bolatyn 253 kottedjdiń qurylysy júrgizilýde.
2021 jyly kólemi 12,6 myń sharshy metr 139 kottedjdi paidalanýǵa berý kózdelgen, onyń ishinde:
-biýdjet qarajaty esebinen jalpy aýdany 9,0 myń sh. m. 96 kottedj úi;
- jeke investitsiialar esebinen 3,6 myń sharshy metr 43 kottedj óz iesin tabady dep kútilýde.
Anar Sabyrova, Almaty oblysy.
