Sulýlyq saiysy «Qazaqstan arýy» ulttyq baiqaýynyń direktsiiasymen kelisilip, qala ákimdiginiń qoldaýymen ótkiziletin resmi joba. Irikteý kezeńinen súrinbei ótken boijetkender «Tanystyrý», «Ásemdik álemi», «Sulýlyq álemi» syndy úsh kezeń boiynsha synǵa tústi. Alǵashqy kezeńde ár arý ózin tanystyrsa, ekinshi kezeńde sahnada júrý, ózin-ózi ustaý sheberligi synaldy. Al úshinshi kezeńde qyzdardyń kóilek tańdaý talǵamy eskerildi.
Osy syndardan esh múdirmei ótken Jazira Ádilbekqyzy «Taldyqorǵan arýy – 2018» ataǵyna ie boldy. Búginde ol Jetisý memlekettik ýniversitetiniń quqyq jáne ekonomika fakýltetiniń 2-kýrs bilimgeri. Endigi kezekte Jazira «Qazaqstan arýy – 2018» ulttyq baiqaýynda qalamyzdyń namysyn qorǵaityn bolady.
Aýqymy keń sulýlyq saiysynda QR Mádeniet salasynyń úzdigi Dáýren Oqapov pen «Han-Táńiri» toby ásem ánnen shashý shashsa, «Taldyqorǵan áýenderi» folklorlyq-etnografiialyq án-bi ansambliniń bishileri myń burala bi biledi. Sonymen qatar sulýlyq saiysyna estradamyzdyń jas juldyzdary «Alem band» toby arnaiy kelip, óner kórsetti.
Aita keteiik, byltyr «Taldyqorǵan arýy – 2017» táji Jadyra Jumaǵulǵa buiyrǵan bolatyn. Bul baiqaý oblysymyzda osymen 9-ynshy ret uiymdastyrylyp otyr.
