كىلەڭ سۇلۋلار ب ا ق سىناعان سايىسقا 16-25 جاس ارالىعىنداعى 45 ارۋ نيەت بىلدىرگەن. ولاردىڭ اراسىنان 14ء-ى ىرىكتەلىپ، اقتىق باسەكەگە جولداما الىپتى.
سۇلۋلىق سايىسى «قازاقستان ارۋى» ۇلتتىق بايقاۋىنىڭ ديرەكسياسىمەن كەلىسىلىپ، قالا اكىمدىگىنىڭ قولداۋىمەن وتكىزىلەتىن رەسمي جوبا. ىرىكتەۋ كەزەڭىنەن سۇرىنبەي وتكەن بويجەتكەندەر «تانىستىرۋ»، «اسەمدىك الەمى»، «سۇلۋلىق الەمى» سىندى ءۇش كەزەڭ بويىنشا سىنعا ءتۇستى. العاشقى كەزەڭدە ءار ارۋ ءوزىن تانىستىرسا، ەكىنشى كەزەڭدە ساحنادا ءجۇرۋ، ءوزىن-وزى ۇستاۋ شەبەرلىگى سىنالدى. ال ءۇشىنشى كەزەڭدە قىزداردىڭ كويلەك تاڭداۋ تالعامى ەسكەرىلدى.
وسى سىنداردان ەش مۇدىرمەي وتكەن جازيرا ادىلبەك قىزى «تالدىقورعان ارۋى – 2018» اتاعىنا يە بولدى. بۇگىندە ول جەتىسۋ مەملەكەتتىك ۋنيۆەرسيتەتىنىڭ قۇقىق جانە ەكونوميكا فاكۋلتەتىنىڭ 2-كۋرس بىلىمگەرى. ەندىگى كەزەكتە جازيرا «قازاقستان ارۋى – 2018» ۇلتتىق بايقاۋىندا قالامىزدىڭ نامىسىن قورعايتىن بولادى.
اۋقىمى كەڭ سۇلۋلىق سايىسىندا ق ر مادەنيەت سالاسىنىڭ ۇزدىگى داۋرەن وقاپوۆ پەن «ءحان-تاڭىرى» توبى اسەم اننەن شاشۋ شاشسا، «تالدىقورعان اۋەندەرى» فولكلورلىق-ەتنوگرافيالىق ءان-بي ءانسامبلىنىڭ بيشىلەرى مىڭ بۇرالا بي بيلەدى. سونىمەن قاتار سۇلۋلىق سايىسىنا ەسترادامىزدىڭ جاس جۇلدىزدارى «Alem band» توبى ارنايى كەلىپ، ونەر كورسەتتى.
ايتا كەتەيىك، بىلتىر «تالدىقورعان ارۋى – 2017» ءتاجى جادىرا جۇماعۇلعا بۇيىرعان بولاتىن. بۇل بايقاۋ وبلىسىمىزدا وسىمەن 9-ىنشى رەت ۇيىمداستىرىلىپ وتىر.
