Birneshe jyl buryn mektepterdegi vahterlerdiń ornyna kásibi kúzet uiymdary engizilgenimen, jaǵdai aitarlyqtai ózgergen joq. Bul týraly Májilis depýtaty Ashat Aimaǵambetov málimdedi, dep habarlaidy Dalanews.kz.
“Rasynda, jasy kelgen adamdar tótenshe jaǵdaida durys áreket ete almaidy dedik. Biraq… ne ózgerdi? Ashyǵyn aitqanda — eshteńe. "Vahter" degen sózdi "kúzetshige" aýystyrdyq, al is júzinde kóbine — sol baiaǵy adamdar. Kóp jaǵdaida – jasy alpystan asqan apa-atalar. Keide tipti burynǵy vahterlerden de alshaq, mekteptiń ishki ómirinen beihabar” – dedi depýtat.
Aimaǵambetovtyń aitýynsha, bul máseleniń basty sebebi – qarjy tapshylyǵy. Tenderdi eń tómen baǵa usynǵan kompaniialar jeńip alady, al olar kásibi daiyndyqtan ótpegen adamdardy jumysqa ornalastyrady.
“Olar muǵalimderdi tanymaidy, mektep rejimin bilmeidi, oqýshylarmen qalai sóilesý kerek ekenin de túsinbeidi. Mektep – jai ǵana ǵimarat emes, bul — balalarymyzdyń ekinshi úii. Al ony qorǵaý – jai ǵana “otyr” dei salatyn jumys emes” – dep atap ótti Aimaǵambetov.
Onyń pikirinshe, kúzet uiymdaryna qoiylatyn talaptar tym álsiz. Qyzmetkerlerdiń jasy, densaýlyǵy, kásibi daiyndyǵy boiynsha naqty talaptar joq. Sonymen qatar mektepterde kúzetshilerdiń sany da jetkiliksiz.
Osyǵan bailanysty depýtat birneshe naqty usynys aitty:
1. Kúzet uiymdaryna qoiylatyn litsenziialyq talaptardy kúsheitý– jasy, bilimi, daiyndyǵy naqty kórsetilýi kerek.
2. El boiynsha biryńǵai standart qabyldaý– Ishki ister ministrligi mektep kúzetiniń ortaq standartyn bekitýi tiis.
3. Kúzet posttarynyń naqty normativin belgileý– mekteptiń kólemi men oqýshy sanyna qarai kúzetshilerdiń sanyn anyqtaý qajet.
4. Satyp alý tetikterin jetildirý– tek eń tómen baǵa usynǵan uiymdardy emes, sapaly qyzmet kórsetetin kompaniialardy tańdaý júiesin qarastyrý kerek.
Aimaǵambetov bul máselede Ishki ister ministrligi men jaýapty organdardyń belsendi áreket etýi qajet ekenin basa aitty.
