Memleket basshysy Qasym-Jomart Toqaev Ermek Saǵymbaevty basqa jumysqa aýysýyna bailanysty Ulttyq qaýipsizdik komitetiniń tóraǵasy laýazymynan bosatý jóninde sheshim qabyldaǵan. Bul týraly Prezidenttiń keńesshisi - baspasóz hatshysy Aibek Smadiiarov málimdedi, dep habarlaidy dalanews.kz.
Prezident arnaiy qyzmetti reformalaý mindetin tabysty oryndaý maqsatynda basshylyq kadrlardyń ornyn aýystyrý qajettigin eskere otyryp, osyndai sheshimge kelgen.
"Memleket basshysy Qasym-Jomart Toqaev Ermek Saǵymbaevty qyzmetten bosatý týraly sheshim qabyldaǵanda jemqorlyq oqiǵasyna qatysy bar laýazymdy tulǵalardy ustaý jaǵdaiyn da eskerdi. Prezidenttiń pikirinshe, kúshtik qurylym qyzmetkerleri qatelikter jibergen. Osyǵan bailanysty ishki ister ministri Erjan Sádenovke qyzmettik eskertý jariialandy. Jalpy, "Samuryq-Qazyna" qory men "Qazaqstan temir joly" kompaniiasy basshylarynyń isindegi korrýptsiialyq sipat esh kúmán týdyrmaidy. Ony tergeý sharalary kezindegi figýranttardyń áreketteri rastady. Prezident júrgizilip jatqan tergeý amaldarynan áýel bastan habardar boldy. Memleket basshysynyń jemqorlyqqa qarsy kúreske qatysty berik ustanymy ózgermeidi", - dep jazylǵan habarlamada.
Sondai-aq, búgin Memleket basshysy Ishki ister ministrliginiń basshylyq quramymen jiyn ótkizgen.
"Prezident qyzmettik tártipti nyǵaitýdy, "Zań men Tártip" qaǵidatyna sai qoǵamdyq qaýipsizdikti qamtamasyz etýge qatysty mindetterdi atqarý barysynda politsiianyń kásibi daiarlyq deńgeiin kóterýdi tapsyrdy. Ministr Erjan Sádenovke politsiianyń qatardaǵy qyzmetkerleri men ofitserlik quramy arasynda tárbie jumystaryn kúsheitý kerek ekeni aityldy", - dep jazylǵan habarlamada.