Óskemende ákesiniń qyzyn erninen súigen sáti túsirilgen video áleýmettik jelide qyzý talqylandy. Osy oqiǵaǵa qatysty Quryltaida ótken brifingte Ishki ister ministrligi men Oqý-aǵartý ministrliginiń ókilderi pikir bildirdi, dep habarlaidy dalanews.kz.
IIM Iývenaldy politsiia basqarmasynyń bastyǵy Ashat Dúisembekovtiń aitýynsha, atalǵan derek boiynsha jan-jaqty tekserý júrgizilgen. Alaida tekserý nátijesinde qylmystyq nemese ákimshilik quqyq buzýshylyq belgileri anyqtalmaǵan.
Osyǵan bailanysty materialdy nomenklatýralyq iske esepten shyǵarý týraly sheshim qabyldanǵan.
Al Oqý-aǵartý ministri Juldyz Súleimenova mundai áreketti qarym-qatynastyń jol berilmeitin túri dep baǵalady.
Ministrdiń sózinshe, biyl mektep baǵdarlamasyna «Jeke qaýipsizdik» páni engizilgen. Onyń negizgi maqsaty – balalarǵa jeke shekarasyn qorǵaýdy, qandai áreketterge jol beriletinin jáne qandai jaǵdailarda óz quqyǵyn qorǵaý kerektigin túsindirý.
Juldyz Súleimenova ár balanyń jeke shekarasyn túsinip, ony qorǵaýdy úirenýi mańyzdy ekenin atap ótti.