بٸرنەشە جىل بۇرىن مەكتەپتەردەگٸ ۆاحتەرلەردٸڭ ورنىنا كەسٸبي كٷزەت ۇيىمدارى ەنگٸزٸلگەنٸمەن, جاعداي ايتارلىقتاي ٶزگەرگەن جوق. بۇل تۋرالى مەجٸلٸس دەپۋتاتى اسحات ايماعامبەتوۆ مەلٸمدەدٸ, دەپ حابارلايدى Dalanews.kz.
“راسىندا, جاسى كەلگەن ادامدار تٶتەنشە جاعدايدا دۇرىس ەرەكەت ەتە المايدى دەدٸك. بٸراق… نە ٶزگەردٸ? اشىعىن ايتقاندا — ەشتەڭە. "ۆاحتەر" دەگەن سٶزدٸ "كٷزەتشٸگە" اۋىستىردىق, ال ٸس جٷزٸندە كٶبٸنە — سول باياعى ادامدار. كٶپ جاعدايدا – جاسى الپىستان اسقان اپا-اتالار. كەيدە تٸپتٸ بۇرىنعى ۆاحتەرلەردەن دە الشاق, مەكتەپتٸڭ ٸشكٸ ٶمٸرٸنەن بەيحابار” – دەدٸ دەپۋتات.
ايماعامبەتوۆتىڭ ايتۋىنشا, بۇل مەسەلەنٸڭ باستى سەبەبٸ – قارجى تاپشىلىعى. تەندەردٸ ەڭ تٶمەن باعا ۇسىنعان كومپانييالار جەڭٸپ الادى, ال ولار كەسٸبي دايىندىقتان ٶتپەگەن ادامداردى جۇمىسقا ورنالاستىرادى.
“ولار مۇعالٸمدەردٸ تانىمايدى, مەكتەپ رەجيمٸن بٸلمەيدٸ, وقۋشىلارمەن قالاي سٶيلەسۋ كەرەك ەكەنٸن دە تٷسٸنبەيدٸ. مەكتەپ – جاي عانا عيمارات ەمەس, بۇل — بالالارىمىزدىڭ ەكٸنشٸ ٷيٸ. ال ونى قورعاۋ – جاي عانا “وتىر” دەي سالاتىن جۇمىس ەمەس” – دەپ اتاپ ٶتتٸ ايماعامبەتوۆ.
ونىڭ پٸكٸرٸنشە, كٷزەت ۇيىمدارىنا قويىلاتىن تالاپتار تىم ەلسٸز. قىزمەتكەرلەردٸڭ جاسى, دەنساۋلىعى, كەسٸبي دايىندىعى بويىنشا ناقتى تالاپتار جوق. سونىمەن قاتار مەكتەپتەردە كٷزەتشٸلەردٸڭ سانى دا جەتكٸلٸكسٸز.
وسىعان بايلانىستى دەپۋتات بٸرنەشە ناقتى ۇسىنىس ايتتى:
1. كٷزەت ۇيىمدارىنا قويىلاتىن ليتسەنزييالىق تالاپتاردى كٷشەيتۋ– جاسى, بٸلٸمٸ, دايىندىعى ناقتى كٶرسەتٸلۋٸ كەرەك.
2. ەل بويىنشا بٸرىڭعاي ستاندارت قابىلداۋ– ٸشكٸ ٸستەر مينيسترلٸگٸ مەكتەپ كٷزەتٸنٸڭ ورتاق ستاندارتىن بەكٸتۋٸ تيٸس.
3. كٷزەت پوستتارىنىڭ ناقتى نورماتيۆٸن بەلگٸلەۋ– مەكتەپتٸڭ كٶلەمٸ مەن وقۋشى سانىنا قاراي كٷزەتشٸلەردٸڭ سانىن انىقتاۋ قاجەت.
4. ساتىپ الۋ تەتٸكتەرٸن جەتٸلدٸرۋ– تەك ەڭ تٶمەن باعا ۇسىنعان ۇيىمداردى ەمەس, ساپالى قىزمەت كٶرسەتەتٸن كومپانييالاردى تاڭداۋ جٷيەسٸن قاراستىرۋ كەرەك.
ايماعامبەتوۆ بۇل مەسەلەدە ٸشكٸ ٸستەر مينيسترلٸگٸ مەن جاۋاپتى ورگانداردىڭ بەلسەندٸ ەرەكەت ەتۋٸ قاجەت ەكەنٸن باسا ايتتى.
