Tájikstan: 13 myń erkek saqalynan aiyryldy
Saqal men hidjabqa qarsy kúresti tájik politsiiasy «Syrttan engen jáne tájik dástúrine sai kelmeitin salttarǵa qarsy kúres» naýqany aiasynda júrgizip jatqanǵa uqsaidy.
Jalpy búginge deiin qaýǵa saqal ósirgen 100 myńnan asa er adam politsiianyń «qaharyna» ushyraǵan eken. Olardyń aty-jóni, turǵylyqty meken-jaiyn anyqtaǵannan keiin quqyq qorǵaýshylar olardy májbúrlei otyra saqal-murttaryn alyp tastaǵan.
Negizi, naýqanǵa bastamashy bolǵan el prezidenti Emomali Rahmon bolatyn.
«Bógde qundylyqtarǵa qyzyqpańyzdar! Bul múlde bóten eldiń mádenieti! Qyz-kelinshekterge aitarym, hidjab kigenshe, ózimizdiń ulttyq úlgidegi ásem kóilekterimizdi kiińder. Tájik qyzy eshqashan qara kiim kimegen. Tipti, qaraly jaǵdaida da kiimniń ózi aq tústi bolatyn», – deidi Memleket basshysy.
Sarapshylardyń aitýynsha, el prezidenti osylaisha eldiń oi-túsinigin ózgertpek. Tájikstandy zaiyrly memleketke ainaldyrmaq.
Másele bul naýqan qalai júrip jatyr? Saqal-murttarynan aiyrylǵandar «bizdi politsiia uryp-soqty» deidi.
Sonyń biri – Jaýdi Ákramov. Aitýynsha, kólikten túsken birneshe politsiia qyzmetkeri 7 jastaǵy balasyn mektepten alyp kele jatqan Ákramovty toqtatyp alyp, politsiia bólimshesine súirelei jónelgen.
«Meni bas-kóz joq boqtai bastady. «Sáláfit, radikal, halyq jaýysyń» dedi. Úsh politsei bolatyn. Ekeýi qolymdy qaiyrdy da, bireýi saqal-murtymdy ala bastady».
Artynan Ákramovty bólimsheden qýyp shyqqan.
«Bul jaǵdai – naǵyz nadandyq. Meniń namysyma tidi. Saqaldy qoishy, erteń-aq ósedi. Qazirgi politsiiada ar joq. Adamdy mazaq qylady. Bulai jasaýǵa bolmaidy, aldymen istiń mán-jaiyn túsindirse bolar edi ǵoi», – deidi jábir kórgen azamat.
Biraq, óziniń ádiletke jeterine Ákramov senbeidi.
«Jurtty bulai túzegen jón emes. Kerisinshe, bul eldiń ashýyna tiedi. Sonyń saldarynan radikaldy kózqaras odan saiyn órshi túsedi», – deidi ol.
Biraq, tájik biliginiń bul máselege qatysty óz ýáji bar. Aitýlarynsha, aldymen bul naýqan «mádenietti» túrde bastalǵan.
Bilik Reseide saqal ósirgeni úshin orys skinhedteriniń qolynan qaza tapqan tájik jigiti Omar Bobodjanovtyń taǵdyryn qaitalamaý úshin ózge azamattardy saqal-murtyn basyp júrýge shaqyrypty. Alaida buǵan qulaq asqan jan bolmaǵan.
Aita ketelik, Tájikstandaǵy barlyq memlekettik mekemelerde hidjab kiiýge tyiym salynǵan. Hidjab kigen áielder kiim úlgisin aýystyrmasa, jumysqa qabyldanbaidy.
El prezidenti Emomali Rahmon kóterip otyrǵan taǵy bir bastama «balaǵa at qoiý» máselesine bailanysty. «Balalarymyzǵa ózimizdiń ulttyq dástúrge sai attardy qoiýymyz qajet» deidi prezident.
Aita ketelik, Tájikstan turǵyndarynyń 99 paiyzy islam dinin ustanady.
