Tájikstannyń quqyqqorǵaý organdary Taiaý Shyǵystaǵy áskeri qimyldarǵa qatysqan 516 turǵynnyń kimder ekenin biledi. Tájikstan prezidenti Emomali Rahmonnyń oblys belsendilerimen kezdesýinde málimdegendei, bul aqparattar 2014 jyldan qazirgi ýaqytqa deiingi aralyqty qamtidy. "Tizimdegi 164 adam tutqyndalǵan, al 24-i eline qaitarylǵan".
Tájikstan prezidenti Hatlon oblysyndaǵy qylmys deńgeiine erekshe alańdaýshylyq bildirdi. Onyń aitýynsha, sońǵy toǵyz jylda jáne biylǵy alty aida oblys aýmaǵynda 40 myń qylmys tirkelgen, olardyń 8 myńǵa jýyǵy - aýyr qylmystar.
Prezident quqyqqorǵaý organdarynan qylmys deńgeiin tómendetýdi, ásirese halyqtyń ekstremistik toptardyń yqpalyna túsip ketýin doǵarýdy talap etti.
Tájik jastarynyń Siriiadaǵy, Iraktaǵy jáne kórshiles Aýǵanstandaǵy soǵystarǵa aralasýy - Dýshanbe biliginiń sońǵy jyldardaǵy bas aýrýyna ainaldy. Tájikstan biligi 1100 turǵynnyń ekstremistik "Islam memleketi" uiymyna kirip ketkenin málimdedi. Buǵan qosa, 300 adam Taiaý Shyǵystaǵy soǵystarda qaza tapqany habarlandy. Bilik buny qaýipti úrdis dep esepteidi.
Tájikstan biligi Siriia men Iraktan óz erkimen oralyp, bilikke berilgen adamdarǵa raqymshylyq jariialady. Bilik "Islam memleketi" jáne basqa da ekstremistik toptar quramynda Siriia men Irakta soǵysyp júrgen tájikterdiń tizimin Interpolǵa izdeýge berdi.
