Tájaiaqov elge oraldy
Azamat Tájaiaqov mingen ushaq Almaty áýejaiyna tańǵy saǵat 5:30- da qondy, – dep habarlaidy KTK telearnasy. Jat jerde jazyqty bolyp, túrmege toǵytylǵan uldaryn qarsy alýǵa ata-anasy men týystary taily-tuiaǵy qalmai túgel kelgen. Birneshe jyldan keiin týǵan jerge tabany alǵash tigen Azamat ushaqtan túse salysymen aǵaiyndarymen arqa-jarqa qushaqtasyp, aqtan dám tatty. 2013 jyldan beri AQSh-ta qamaýda bolǵan ol basyna úiirilgen qara bulttyń seiilgenin endi ǵana sezingendei.
Azamat Tájaiaqov:
– Qazir júregim toqtap qalardai bolyp tur. Qatty soǵyp jatyr. Qýanyshymda shek joq. Kelip kútip alǵandaryńyzǵa rahmet. Ákeme qońyraý shalyp jaǵdaiymdy bilip turǵandaryńyzǵa rahmet. 3,5 jyl boldy Qazaqstanda bolmaǵanyma. Et jep demalyp, qymyz iship jatqym keledi.
AQSh-qa bilim alamyn dep baryp, basy bálege qalǵan ulymen qaita qaýyshqan ata-ananyń da qýanyshynda shek joq. Sebebi olar 3 jyl boiy kúndiz kúlkiden, túnde uiqydan aiyrǵan kókeidegi kirbińnen arylyp otyr. Sondyqtan Ámir Ysmaǵulov balasynyń tileýin tilegen barsha halyqqa alǵys aityp, aǵynan jaryldy.
Ámir Ysmaǵulov, Azamat Tájaiaqovtyń ákesi:
– Bizdiń otbasy úshin búgin eń baqytty kún. Men prezident Nursultan Nazarbaevqa úlken rahmet aitqym keledi. Óitkeni balalar 25 jyl alýy múmkin edi. Sodan keiin Bas prokýratýraǵa, Syrtqy ister ministrligine rahmet aitqym keledi. Jáne qazaq halqyna rahmetimdi aitamyn.
Azamat Tájaiaqov túrmede tekke jatpai til meńgergen eken. Iaǵni aǵylshynnan bólek ispan, qytai tilderin úirengen. Sondyqtan aldaǵy ýaqytta bilimin sol Qytaida jetildirýi múmkin. Sebebi muhittyń arǵy betine endi qaityp bara almaidy.
Ámir Ysmaǵulov, Azamat Tájaiaqovtyń ákesi:
– Ol 2 jyl oqýyn oqydy. Biraq endi ol Amerikada oqymaidy. Ol basqa jaqta oqidy.
2013 jyldyń sáýirinde Bostondaǵy marafon kezinde jarylys bolyp, 4 adam qaza tapqan. Lańkestik áreketti uiymdastyrǵan aǵaiyndy Tsarnaevtardyń úlkeni Tamerlan quryqtaý sharasy kezinde ólse, kishisi Johardy AQSh soty ony ólim jazasyna kesti. Al eki qazaq stýdenti - Azamat Tájaiaqov pen Dias Qadyrbav osy kishi Tsarnaevqa kómektesti degen aiyppen jazaǵa tartylǵan bolatyn.
Qazir Amerika túrmesinde taǵy bir otandasymyz jazasyn ótep jatyr. Dias Qadyrbaev ta Bostondaǵy oqiǵaǵa qatysty terrorizm baby boiynsha aiyptalyp, 6 jylǵa bas bostandyǵynan aiyrylǵan bolatyn. Sondyqtan ol endi 2 jyldan keiin elge oralmaq. Al jazadan tolyq qutylǵan Azamat Tájaiaqov búgin túnde týǵan jeri Atyraý oblysyna jol taratady. Sebebi ol úshin 3 jarym jyldan asa ýaqytqa sozylǵan azapty kúnder osymen aiaqtaldy.
