Qazaqstanda taǵy bir sanattaǵy azamattar úshin mindetti áleýmettik meditsinalyq saqtandyrý (MÁMS) qoryna jarnany ákimdikter tóleitin bolady. Bul jańashyldyq 2026 jyldyń 1 qańtarynan bastap kúshine enýi múmkin, dep habarlaidy Dalanews.kz.
Tiisti norma MÁMS týraly zań jobasyna engizilip, Májiliste birinshi oqylymda qaraldy.
Jańa jeńildik sanatyna áleýmettik turǵydan osal azamattar kirmek. Naqtyraq aitqanda, ál-aýqat deńgeii "daǵdarystyq" nemese "shuǵyl" dep baǵalanatyn otbasylar qamtylady. Bul týraly Eńbek jáne halyqty áleýmettik qorǵaý vitse-ministri Oljas Anafin málimdedi.
Onyń aitýynsha, 2023 jyldan beri elimizde "Otbasynyń tsifrlyq kartasy" júiesi jumys isteidi. Sol arqyly 20 million azamat 6,2 million otbasyǵa bólingen. Qazirgi tańda áleýmettik ál-aýqat deńgeiin anyqtaýdyń arnaiy ádistemesi bar. Bul ádisteme 8 negizgi baǵyt boiynsha 80 kórsetkishti qamtidy. Olar: tabys, múlik, bilim deńgeii, jumysbastylyq, densaýlyq jaǵdaiy jáne taǵy basqa parametrler. Ár kórsetkishke belgili bir upai beriledi. Jinaqtalǵan upai sanyna qarai otbasy áleýmettik sanatqa jikteledi.
Mysaly, eger otbasy -29-dan -460-qa deiin upai jinasa, ol "D sanatyna", al -460 upaidan tómen bolsa, "E sanatyna" jatqyzylady.
Zań jobasyna sáikes, dál osy D jáne E sanatyndaǵy otbasylardyń músheleri úshin MÁMS jarnalaryn ákimdikter ózderi tóleitin bolady.
