Қазақстанда тағы бір санаттағы азаматтар үшін міндетті әлеуметтік медициналық сақтандыру (МӘМС) қорына жарнаны әкімдіктер төлейтін болады. Бұл жаңашылдық 2026 жылдың 1 қаңтарынан бастап күшіне енуі мүмкін, деп хабарлайды Dalanews.kz.
Тиісті норма МӘМС туралы заң жобасына енгізіліп, Мәжілісте бірінші оқылымда қаралды.
Жаңа жеңілдік санатына әлеуметтік тұрғыдан осал азаматтар кірмек. Нақтырақ айтқанда, әл-ауқат деңгейі "дағдарыстық" немесе "шұғыл" деп бағаланатын отбасылар қамтылады. Бұл туралы Еңбек және халықты әлеуметтік қорғау вице-министрі Олжас Анафин мәлімдеді.
Оның айтуынша, 2023 жылдан бері елімізде "Отбасының цифрлық картасы" жүйесі жұмыс істейді. Сол арқылы 20 миллион азамат 6,2 миллион отбасыға бөлінген. Қазіргі таңда әлеуметтік әл-ауқат деңгейін анықтаудың арнайы әдістемесі бар. Бұл әдістеме 8 негізгі бағыт бойынша 80 көрсеткішті қамтиды. Олар: табыс, мүлік, білім деңгейі, жұмысбастылық, денсаулық жағдайы және тағы басқа параметрлер. Әр көрсеткішке белгілі бір ұпай беріледі. Жинақталған ұпай санына қарай отбасы әлеуметтік санатқа жіктеледі.
Мысалы, егер отбасы -29-дан -460-қа дейін ұпай жинаса, ол "D санатына", ал -460 ұпайдан төмен болса, "E санатына" жатқызылады.
Заң жобасына сәйкес, дәл осы D және E санатындағы отбасылардың мүшелері үшін МӘМС жарналарын әкімдіктер өздері төлейтін болады.
