Aqtaýda áskerı qyzmetshi kóz jumdy, dep habarlaıdy Dalanews.kz.

Qurlyq áskeriniń baspasóz qyzmeti málimetinshe, 14 qańtarda bólimshe Aqtaý garnızonynyń Oımashy áskerı polıgonynan qaıtyp kele jatqan kezde jol apaty bolǵan. Qarańǵy túsken ýaqytta kóktaıǵaq saldarynan KamAZ kóligi kelisimshart boıynsha qyzmet atqaratyn kishi serjant G. esimdi áskerı qyzmetshini qaǵyp ketken.

"Jaraqat saldarynan áskerı qyzmetshi oqıǵa ornynda kóz jumdy. Bul derek boıynsha sotqa deıingi tergep-tekserý júrgizilip, oqıǵanyń mán-jaıy anyqtalyp jatyr", - dep jazylǵan habarlamada.

Qarýly Kúshter qolbasshylyǵy qaza tapqan áskerı qyzmetshiniń týǵan-týystary men jaqyndaryna kóńil aıtty.

"Otbasyna zańnamaǵa sáıkes kómek kórsetiledi", - dep jazylǵan habarlamada.