Perızat Qaırat pen anasy Gaını Alashbaevaǵa qatysty 3,5 mıllıard teńge jymqyrý isi boıynsha ótip jatqan sot otyrysynda aıyptalýshy kýálarǵa belsendi túrde suraq qoıyp, keı sátte tolqyǵany baıqaldy, dep habarlaıdy Dalanews.kz.

Kýáger retinde sotta Sergeı Matúshenko sóz sóıledi. Ol – volonterlikpen aınalysqan ári Qaırat qurǵan «Biz Birgemiz Kazakhstan» uıymynyń quryltaı qujattarynda kórsetilgen tulǵa. Búgingi tyńdalym barysynda Matúshenko qujattardyń birine qol qoımaǵanyn málimdedi. Osydan keıin sot zalynda emosıalyq dıalog oryn aldy.

– Ekinshi hattamaǵa shynymen qol qoımaǵanyńyzdy rastaısyz ba? – dep surady Perızat Qaırat.

– Rastaımyn, – dep jaýap berdi kýáger.

– Ótirik aıtyp turǵan joqsyz ba? – dedi aıyptalýshy dirildegen únmen.

– Joq, ótirik aıtpaımyn, – dedi Matúshenko.

– Túsinesiz be, bul jerde meniń taǵdyrym sheshilip jatyr, – dedi Perızat kózine jas alyp.

– Perızat, men hattamany óz kózimmen kórdim. Onda meniń qolym joq, – dep jaýap berdi kýáger.

Osydan keıin sýdıa aıyptalýshyǵa eskertý jasap, kýálardy qysym arqyly ózine tıimdi jaýapqa ıtermeleýge bolmaıtynyn eske saldy.