Singapýr premer-ministri Loýrens Vongtyń jyldyq eńbekaqysy 1,6 eseden astam ósip, 3,6 mln singapýr dollaryna, iaǵni shamamen 2,85 mln AQSh dollaryna jetedi. Buǵan deiin ol jylyna 2,2 mln singapýr dollaryn alyp kelgen, dep habarlaidy dalanews.kz.
CNBC málimetinshe, bul sheshim eldegi ministrlerdiń jalaqysyn kóterý aiasynda qabyldanǵan. Singapýr biligi saiasi qyzmetkerlerdiń eńbekaqysyn keiingi 15 jylda alǵash ret qaita qarap otyr.
Premer-ministrdiń jańartylǵan tabysy turaqty jáne qyzmet nátijesine bailanysty ózgermeli tólemderden quralady. Alaida Loýrens Vong aldaǵy bes jyl boiy jalaqysyna qosylǵan ústemeaqynyń barlyǵyn qaiyrymdylyqqa jumsaýǵa ýáde berdi.
Jańa esep boiynsha, tómengi deńgeidegi ministrdiń jyldyq eńbekaqysy 1,1 mln-nan 1,8 mln singapýr dollaryna deiin kóteriledi. Al premer-ministrdiń tabysy osy kórsetkishten eki ese joǵary bolyp belgilengen.
Singapýrda saiasatkerlerdiń jalaqysy jeke sektordaǵy tabyspen salystyryla esepteledi. Atap aitqanda, ministrdiń bazalyq eńbekaqysy eń joǵary tabys tabatyn myń azamattyń medianalyq kirisinen 40 paiyzǵa tómen deńgeide bekitiledi.
15 qazannan bastap qazirgi saiasi laýazym ielerine eńbek nátijesi, atqaratyn mindeti jáne jalaqysynyń sońǵy ret qashan ózgertilgeni eskerilip, 9 paiyzǵa deiin birjolǵy ústemeaqy beriledi. Keiingi ósim ár sheneýniktiń jumys kórsetkishine qarai kezeń-kezeńimen júzege asyrylady.
Singapýr biliginiń túsindirýinshe, joǵary eńbekaqy memlekettik qyzmetke biznes, qarjy jáne ózge de tabysy mol salalarda jumys istei alatyn bilikti mamandardy tartýǵa múmkindik beredi.
Loýrens Vong álemdegi eń joǵary jalaqy alatyn úkimet basshylarynyń biri sanalady. Salystyrý úshin, Shveitsariia prezidentiniń jyldyq tabysy shamamen 600 myń, Avstraliia premer-ministriniki 450 myń, al AQSh prezidentiniki 400 myń dollardy quraidy.
