Qarjylyq monıtorıń agenttigi Bas prokýratýranyń úılestirýimen aǵymdaǵy jyldyń 8-10 aqpany aralyǵynda elimizdiń barlyq óńirlerinde keń aýqymdy operasıa júrgizdi, nátıjesinde tutyný kooperatıviniń atyn jamylǵan "Asar Baspana" qarjy pıramıdasynyń zańsyz qyzmeti toqtatyldy, dep habarlaıdy Dalanews.kz.

Qarjy pıramıdasyn uıymdastyrýshylar salymshylarǵa jyljymaıtyn múlikti, kólik quraldaryn, sondaı-aq turmystyq ónimderdi (bıologıalyq belsendi qospalar, as úı ydystary, kosmetıka, turmystyq hımıa jáne basqa da taýarlar) satyp alý úshin qarajat salýdy usynǵan, al qarymyna aı saıyn salynǵan somanyń 30% - na deıin paıda tabýǵa ýáde bergen.

Kompanıalardyń keńselerinde jáne kúdiktilerdiń turǵylyqty jeri boıynsha júrgizilgen tintý barysynda 1,2 mlrd teńgeden astam somada qolma-qol aqsha jáne  ishinde premıým klasty kólikter bar 13 avtomashına tárkilendi.

Eki qarjylyq pıramıda uıymdastyrýshy ustalyp, olarǵa qatysty sot eki aı merzimge qamaýǵa alý túrindegi is-shara sanksıalady.

Sotqa deıingi tergeý jalǵasýda.

QR QİJK-niń 201-babyna sáıkes ózge de aqparat jarıa etýge jatpaıdy.