Shymkenttegi Qainarbulaq turǵyn alabynda kommýnaldyq qyzmetke tiesili júk kóligi 11 jastaǵy balany qaǵyp ketip, ol oqiǵa ornynda kóz jumdy. Qaiǵyly jaǵdai jaiaý júrginshiler ótkelinde bolǵan, dep habarlaidy dalanews.kz.
KTK telearnasynyń málimetinshe, qaza tapqan besinshi synyp oqýshysy Nurasyl kishi qaryndasymen birge dúkenge balmuzdaq alýǵa shyqqan. Balalar joldy jaiaý júrginshiler ótkeli arqyly kesip ótpek bolǵan kezde olardy júk kóligi qaǵyp ketken.
Aýyr jaraqat alǵan 11 jastaǵy bala oqiǵa ornynda qaitys boldy. Marqumnyń ákesi uly joldy «zebramen» ótip bara jatqanyn aityp, kináli adamnyń zań aiasynda jazalanýyna úmit bildirdi.
Telearna siýjetinde aitylǵandai, kólik júrgizýshisi Abai aýdandyq ákimdigine qarasty kommýnaldyq kásiporyndardyń birinde jumys isteidi. Oqiǵadan keiin júrgizýshi ustalyp, júk kóligi aiyp turaǵyna qoiylǵan. Kýágerlerdiń sózinshe, jol apatynan keiin júrgizýshi eseńgirep qalǵan.
Politsiia qylmystyq is qozǵady
Shymkent qalalyq politsiia departamenti adam ólimine ákelgen jol-kólik oqiǵasy boiynsha qylmystyq is qozǵalǵanyn habarlady. Politsiia málimetinshe, júk kóliginiń júrgizýshisi Qainarbulaq shaǵynaýdanyndaǵy jaiaý júrginshiler ótkelinde kámeletke tolmaǵan balany qaǵyp ketken.
«Jol-kólik oqiǵasy saldarynan bala oqiǵa ornynda kóz jumdy», – dep málimdedi vedomstvo.
