Májilistiń bir top depýtaty ýaqyt beldeýine ózgertýge bailanysty úndeý jasap, aldaǵy ýaqytta Parlamenttiń jalpy otyrysynda másele kóteriletinin málim etti, dep habarlaidy Dalanews.kz.
Bul týraly Májilis depýtaty Maqsat Tolyqbai instagram paraqshasynda aitty.
– Myńdaǵan halyqtyń aryz-shaǵymy, tilegine orai arnaiy málimdeme jasaǵymyz kelip otyr. Búgin “Amanat” fraktsiiasynyń Májiliste arnaiy jiynyn ótkizdik. Osyndaǵy áriptesterimiz kýá: osy jazda óńirlerdi aralaǵan kezde, ásirese Shyǵys Qazaqstan, Pavlodar, Soltústik Qazaqstan, Abai oblysy, Jetisý óńirinde halyq tarapynan eń kóp qoiylǵan suraq – ýaqyt beldeýine bailanysty boldy. Olar burynǵy ýaqyttyń qaitarylýyn talap etip jatyr. Bálkim, Qostanai, Qyzylorda, Batys Qazaqstan úshin osy ýaqyt beldeýi yńǵaily shyǵar. Biraq shyǵys úshin tiimsiz. Bizdiń Shyǵys Qazaqstanda tańǵy eki jarymda tań atady. Siyrdyń móńiregen daýysynan oianasyń. Keshki bes-alty tasqarańǵy. Ekinshi, úshinshi aýysymda oqityn oqýshylar bar. Olar qalai qaitady? Aýyldy jerlerde tipti jaryq joq" – deidi Maqsat Tolyqbai bastaǵan bir top depýtat.
Halyq qalaýlylary jer úlken bolǵan soń georafiia boiynsha ýaqyt beldeýi aldyn ala zerttelýi kerek edi deidi. Depýtattardyń sózinshe, onyń densaýlyqqa qanshalyqty ziian ekeni, qansha energiia artyq shyǵyndalyp jatqany aldyn ala zerttelýi qajet bolǵan.
– Sondyqtan, búgin arnaiy fraktsiianyń jiynyn ótkizdik. Ýáde etkendei aldaǵy ýaqytta Parlamenttiń jalpy otyrysynda Úkimet múshelerin, ǵalymdardy, mamandardy shaqyryp, tyńdaý ótkizemiz. Naqty usynystaryńyz bolsa aityńyzdar. Úkimettiń naqty sheshim qabyldaýyna yqpal etemiz, – deidi olar.
Maqsat Tolyqbaimen Nurtai Sábilianov ta Abai oblysyna barǵanda osy máseleni halyq kóp kótergenin atap ótti.
Aita keteiik, biyl 1 naýryzdan bastap jańa ýaqyt beldeýine kóship, búkil elde ýaqyt teńestirilgen bolatyn. Úkimet basshysy taiaýda Qazaqstan aýmaǵynda ýaqyt esepteý tártibi týraly qaýlyǵa qol qoiǵan edi.
