ءماجىلىستىڭ ءبىر توپ دەپۋتاتى ۋاقىت بەلدەۋىنە وزگەرتۋگە بايلانىستى ۇندەۋ جاساپ، الداعى ۋاقىتتا پارلامەنتتىڭ جالپى وتىرىسىندا ماسەلە كوتەرىلەتىنىن ءمالىم ەتتى، دەپ حابارلايدى Dalanews.kz.
بۇل تۋرالى ءماجىلىس دەپۋتاتى ماقسات تولىقباي ينستاگرام پاراقشاسىندا ايتتى.
– مىڭداعان حالىقتىڭ ارىز-شاعىمى، تىلەگىنە وراي ارنايى مالىمدەمە جاساعىمىز كەلىپ وتىر. بۇگىن “امانات” فراكسياسىنىڭ ماجىلىستە ارنايى جيىنىن وتكىزدىك. وسىنداعى ارىپتەستەرىمىز كۋا: وسى جازدا وڭىرلەردى ارالاعان كەزدە، اسىرەسە شىعىس قازاقستان، پاۆلودار، سولتۇستىك قازاقستان، اباي وبلىسى، جەتىسۋ وڭىرىندە حالىق تاراپىنان ەڭ كوپ قويىلعان سۇراق – ۋاقىت بەلدەۋىنە بايلانىستى بولدى. ولار بۇرىنعى ۋاقىتتىڭ قايتارىلۋىن تالاپ ەتىپ جاتىر. بالكىم، قوستاناي، قىزىلوردا، باتىس قازاقستان ءۇشىن وسى ۋاقىت بەلدەۋى ىڭعايلى شىعار. ءبىراق شىعىس ءۇشىن ءتيىمسىز. ءبىزدىڭ شىعىس قازاقستاندا تاڭعى ەكى جارىمدا تاڭ اتادى. سيىردىڭ موڭىرەگەن داۋىسىنان وياناسىڭ. كەشكى بەس-التى تاسقاراڭعى. ەكىنشى، ءۇشىنشى اۋىسىمدا وقيتىن وقۋشىلار بار. ولار قالاي قايتادى؟ اۋىلدى جەرلەردە ءتىپتى جارىق جوق" – دەيدى ماقسات تولىقباي باستاعان ءبىر توپ دەپۋتات.
حالىق قالاۋلىلارى جەر ۇلكەن بولعان سوڭ گەورافيا بويىنشا ۋاقىت بەلدەۋى الدىن الا زەرتتەلۋى كەرەك ەدى دەيدى. دەپۋتاتتاردىڭ سوزىنشە، ونىڭ دەنساۋلىققا قانشالىقتى زيان ەكەنى، قانشا ەنەرگيا ارتىق شىعىندالىپ جاتقانى الدىن الا زەرتتەلۋى قاجەت بولعان.
– سوندىقتان، بۇگىن ارنايى فراكسيانىڭ جيىنىن وتكىزدىك. ۋادە ەتكەندەي الداعى ۋاقىتتا پارلامەنتتىڭ جالپى وتىرىسىندا ۇكىمەت مۇشەلەرىن، عالىمداردى، مامانداردى شاقىرىپ، تىڭداۋ وتكىزەمىز. ناقتى ۇسىنىستارىڭىز بولسا ايتىڭىزدار. ۇكىمەتتىڭ ناقتى شەشىم قابىلداۋىنا ىقپال ەتەمىز، – دەيدى ولار.
ماقسات تولىقبايمەن نۇرتاي ءسابيليانوۆ تا اباي وبلىسىنا بارعاندا وسى ماسەلەنى حالىق كوپ كوتەرگەنىن اتاپ ءوتتى.
ايتا كەتەيىك، بيىل 1 ناۋرىزدان باستاپ جاڭا ۋاقىت بەلدەۋىنە كوشىپ، بۇكىل ەلدە ۋاقىت تەڭەستىرىلگەن بولاتىن. ۇكىمەت باسشىسى تاياۋدا قازاقستان اۋماعىندا ۋاقىت ەسەپتەۋ ءتارتىبى تۋرالى قاۋلىعا قول قويعان ەدى.
