Úzdiksiz qoqan-loqy men shaǵymdardyń sońy sýitsidpen aiaqtaldy deidi ujymdastary. 46 jastaǵy direktor qorasyna baryp asylyp qalǵan. Qaiǵyly jaǵdaidan keiin arnaiy komissiia qurylyp, muǵalimderdiń shaǵymy boiynsha qazir qyzmettik tekseris bastaldy.
Úlken Aqsý aýylyndaǵy oqý jyly úlken shýmen bastaldy. Bir jarym jyl onlain oqýdan keiin mektepke oqýshylardyń oralyp azan-qazan bolǵany kúni keshe edi. Mekteptegi merekelik kóńil kúidi direktordyń qazasy sý sepkendei basty. 46 jastaǵy Azizjan Daraev óz úiiniń qorasynda asylyp qalǵan. Bilim salasynda uzaq jyl eńbek etken basshynyń artynda ańyrap anasy men jubaiy jáne úsh uly qaldy.
Marqumnyń jubaiy Rýmila Zýliarova kúieýi ózine eshteńe aitpaǵanyn aitady.
“Tek ujymy men jurt kelip aityp jatyr. Men túsinbei qaldym. Aldyn ala bilgen bolsam, úsh ulymnyń ákesin ólimge qalai qiiar edim”, – deidi ol.
Marqumnyń jaqyndary aýyl-aimaqqa abyroily azamattyń ózine qol jumsaýyna mekteptegi janjal túrtki boldy degen senimde.
Aǵasy Asyl Sádirdinuly A.Daraevqa kóp qysym bolǵanyn alǵa tartady.
“Arandatýshylyq bolǵan. Ony biz keiinnen estip otyrmyz. Olbekerden-beker ólimge baratyn jigit emes. On shaqty jigit qorshap alyp ursa da ólmeitin jigit edi. Soǵan jetkizgen. Itermelegen. Mektep basshysynyń ólimi ujymyn da túgel eseńgiretip tastaǵan”, – deidi ol.
Muǵalimder qaiǵyly jaǵdaiǵa direktordyń sharýashylyq jónindegi orynbasary kináli dep otyr. Ulardai shýlaǵan ustazdar Marat Muhamedov jumysqa kelgeli bilim oshaǵynyń basshysyna maza bermei, qoqan-loqy kórsetkenin jetkizdi. Odan qalsa direktorǵa qaramaǵyndaǵy qyzmetkerlerdi qarsy qoiyp, onyń ústinen shaǵymdy qarsha boratypty-mys.
Farida Nurahýnova, muǵalim: “Osy kisi jumysqa ornalasqaly ujymnyń berekesi qashty. Aýdannan komissiia mektepke jii keletin boldy. Ol mektep direktorynyń ústinen aryz jazyp, kásipodaq ókilderin kóp shaqyratyn. Direktor ony jumystan shyǵaryp jiberdi. Biraq ol meni zańsyz qýdy dep sotqa júgindi. Prokýratýraǵa jazdy. Direktordyń júikesin juqartty. Basshymyzdyń sýitsidke barýyna da sol adamnyń qatysy bar”.
“Direktordy sýitsidke aparǵan – sol. Men birinshi qabatty jýamyn. Direktordyń kabinetinde kúnde aiqai-shý. Kináli. Soǵan apardy. Bir jyldan asty, streste júrmiz. Ol bizdiń sabynymyz bar ma, qalai jumys istep jatyrmyz, eshteńege bas qatyrmaidy”, – deidi eden jýýshyJámilá Omarova.
Sharýashylyqqa jaýapty azamat aryzben ǵana shektelmegen syńaily. Muny onyń tikelei qaramaǵynda istegen jumysshylary jamyrai aitty. Aldy tipti sotqa da júgingen eken.
“Kirgende maǵan tiisti. Tiiskende janyma kelip, sipalap, súigeli jatyr. Men iterip, kabinetime shyǵyp kettim. Men jalǵyzbasty áiel bolǵan soń, maǵan tiisken shyǵar dep kóńilime almadym. Biraq ol basqa qyzdarǵa tiiskenin jinalysta bildim. Sotta dálel joq dep, men ózimdi aqtai almadym” – deidi eden jýýshy Nadim Ilahýnova.
Al Marat Muhamedov ózine shań jýytpady. Aitýynsha, taǵylǵan aiyptardyń barlyǵy negizsiz. Jumystan da zańsyz qýylǵanyn sotta dáleldep qaita kelipti.
“Eshkimge tiisken joqpyn. Adal eńbek ettim. Bul qyzmetkerlerge bóget boldym ba, bilmeimin. Sosyn olar maǵan jala japty. Sýitsidti bir Qudai biledi. Múmkin direktordyń otbasynda janjal bolǵan shyǵar. Ekeýmizdiń aramyzda eshqandai kikiljiń bolǵan emes”, – deidi mektep direktorynyń sharýashylyq jónindegi orynbasary Marat Muhamedov.
“10 maýsym kúni qaita qabyldanǵan. 26 tamyzǵa deiin densaýlyǵyna bailanysty demalysta boldy bul kisi. Osy oqiǵadan keiin men direktordyń ýaqytsha mindetin atqaratyn adamdy taǵaiyndadym. Osy kisige bizge qaitadan aryz tústi. Sondyqtan buiryq shyǵaryp, sharýashylyq jónindegi orynbasary retindegi jumystarynyń barlyǵyn qabyldap alyp jatyrmyz”, –deidi Uiǵyr aýdany bilim bóliminiń basshysy Ádiljan Áshirov.
Aýdanda mektep direktorynyń ólimine qatysty arnaiy komissiia qurylyp, tekseris bastalǵan. Sýitsidke qatysty qazir politsiia qylmystyq is te qozǵaǵan. Al Marat Muhamedov jumysynan ýaqytsha shettetildi. Alaida ustazdar bul qyzmetker jumystan qýylmasa, aryz-shaǵymymyzdy bilim ministrligine joldaimyz dep bekinip otyr.
Aita keteiik, Almaty oblysy Avat aýylynda 46 jastaǵy mektep direktorynyń asylyp turǵan denesi qoradan tabyldy.
https://www.youtube.com/watch?v=irGRQrauEOs
