Jıynda mınıstrdiń orynbasary Jeńis Óserbaıǵa birneshe ret memlekettik tilde suraq qoıyldy. Alaıda sheneýnik bárine oryssha jaýap bergen. Sol sebepti, Májilis tóraǵasynyń orynbasary Balaım Kesebaeva vıse-mınıstrge eskertý jasady.
– Barlyq memlekettik qyzmetker qazaq tilin, memlekettik tildi bilýi kerek. Ol boıynsha da daıyndalyp kelýińiz shart, – dedi ol.
Sondaı-aq Májilis depýtaty Elnur Beısenbaev Ulttyq ekonomıka birinshi vıse-mınıstri Tımýr Jaqsylyqovqa suraq qoıyp, oǵan qazaq tilinde jaýap berýdi surady.
– «Dıplommen – aýylǵa» degen baǵdarlama boıynsha qansha mamandy aýylǵa tarttyq? Qansha balyqshy bilim aldy? Aýyl sharýashylyǵy mınıstrligine, shekara qyzmetiniń birinshi orynbasaryna qazaq tilinde suraq qoıyldy. Olar sıaqty saýalǵa orys tilinde jaýap berseńiz, onda jaýap qaıtarmaı-aq qoıyńyz! Ózge vıse-mınıstrden jaýapty qaǵaz túrinde alamyn. Memlekettik qyzmetkerdiń memlekettik tilde – qazaqsha qoıylǵan suraqqa ózge tilde – oryssha jaýap berýin nonsens dep sanaımyn», - dedi depýtat.
Osy eskertýden keıin birinshi vıse-mınıstr saýalǵa memlekettik tilde jaýap berdi.
