Merekelik saltanatty keshke QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin, QR Bilim jáne ǵylym vitse-ministri Qýanysh Erǵaliev, QR Parlamenti Májilisiniń depýtaty Irina Smirnova, JOO rektorlary, ǵalymdar, ziialy qaýym ókilderi, SDÝ túlekteri men jergilikti ákimshilik mekemeleriniń ókilderi qatysty.
Arnaiy jyly lebizderimen kelgen qonaqtar Ýniversitetke jaqsy tilekteri men syilyqtaryn berip, merekelik kontserttiń kýágeri bolyp qaitty.
QR Bilim jáne ǵylym ministrliginiń atynan vitse-ministri Qýanysh Erǵaliev Táýelsizdiktiń 30 jyldyǵyna orai SDÝ qaýymdastyǵyndaǵy 30 qyzmetkerge bilim jáne ǵylym jolyndaǵy kóp jylǵy eńbekteri úshin alǵys hattarmen marapattady.
Sonymen qatar, SDÝ-diń túlegi QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin jinalǵan qaýymǵa stýdenttik kezderdegi estelikterin aityp, Ýniversitet ujymyn 25 jyldyq mereitoimen quttyqtady.
SDÝ rektory Davron Gaipov óz kezeginde SDÝ-dyń professor-oqytýshylyq quramyn, stýdentterin jáne barlyq qyzmetkerleri men túlekterdi oqý ornynyń 25 jyldyq mereitoiymen quttyqtady.
"Shirek ǵasyr ýaqyt ishinde túlep ushqan 7 myńnan asa shákirtterimiz tek Qazaqstanda ǵana emes, alys-jaqyn shetelderde qyzmet etip, pedagogika men aqparattyq tehnologiialar, quqyq, áleýmettik ǵylymdar jáne biznes salasy boiynsha eńbek naryǵynda ozyq oilary men tereń ushqyrlyqtarynyń arqasynda erekshelenip keledi. Bul úrdis odan ári jalǵasyn tabady degen úlken senimdemiz.
Álemdik arenada básekege qabiletti kásibi mamandar jáne ulttyq qundylyqtardy boiyna sińirgen, halqyna adal tulǵalardy shyǵarý bizdiń túpkilikti maqsattarymyzdyń biri. Sol maqsattarǵa qol jetkizip, elimiz gúldene bersin", – dedi Davron Gaipov.
SDÝ-diń túlegi QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin oqý ornynda bilim alǵan ýaqytty eske alyp, ýniversitettiń basty qundylyqtaryn tilge tiek etti.
"Úlkenderdi qurmet tutyp, kishilerge demeý bolyp, ózara syilastyq ornatýǵa tárbieleitin. Eger bireý oqý barysynda qinalyp júrse nemese synaqtan óte almasa, oqytýshylar kózbe-kóz sóilesip, sebebin anyqtap, jan-jaqty qoldaý kórsetetin. Olar bizge úlken senim artyp, jigerlendirip, shabyttandyryp otyratyn.
Áli esimde, birde biz ustazymyzǵa óz ideiamyz (startapymyz;) jaily aittyq, alaida ony júzege asyrýǵa kompiýterimiz bolmady. Al ol bizge sabaqtan keiin tájiribehanaǵa kelip, jobamen jumys isteýge ruqsat etti. Sóitip biz dostarymyzben birge bir ai ishinde óz ónimimizdi jasap shyǵardyq.
SDÝ jastardy úlken ómirge daiyndaý mindetin abyroimen atqaryp keledi.
Kezinde osy ýniversitetti tańdaǵanymdy maqtan etemin. Meni shaqyrǵandaryńyzǵa alǵys aityp, árbir stýdentke sáttilik tileimin. SDÝ-dyń mártebesi biik, mereii ústem bolsyn", – dedi Mýsin.
Dalanews.kz anyqtamasy:
Sýleiman Demirel atyndaǵy Ýniversiteti – 1996 jyly Tuńǵysh Prezident- Elbasy Nursultan Ábishuly Nazarbaev pen elimizdiń táýelsizdigin alǵash tanyǵan elderdiń qataryndaǵy Túrkiia memleketiniń 9-shy prezidenti Sýleiman Demireldiń qatysýymen ashyldy.
Shirek ǵasyrda oqytýdy aǵylshyn tilinde júrgizgen elimizdegi alǵashqy ýniversitetterdiń biri bolyp tabylatyn SDÝ-da 55 bilim berý baǵdarlamasy, onyń ishinde 28 bakalavriat, 20 magistratýra, 7 doktorantýra baǵdarlamalary boiynsha 7 myńnan asa túlek shyǵardy. Onyń ishinde bilim berý baǵdarlamalarynyń 80%-dan astamy aǵylshyn tilinde, qalǵany qazaq jáne orys tilderinde júrgiziledi.
Oqý orny ásirese IT salasynda, injeneriia, quqyq, ekonomika jáne biznes salalarynda ozyq oilary men tereń ushqyrlyqtarynyń arqasynda erekshelenip keledi.
Ýniversitettiń Strategiialyq damý josparynyń basty maqsaty – elimizdegi jáne Orta Aziiadaǵy tańdaýly, halyqaralyq úlgidegi joǵarǵy oqý oryndarynyń biri bolý.
