Áleýmettik jelilerde Qazaqstan prezidenti Qasym-Jomart Toqaevqa joldanǵan ujymdyq úndeý tarady. Onyń avtorlary ózderin Oqý-aǵartý ministrliginiń qyzmetkerleri retinde tanystyryp, ministr Juldyz Súleimenovany qyzmetinen bosatýdy talap etti, dep habarlaidy dalanews.kz.
Úndeý avtorlary ministrlikte qysym kúsheiip, jappai jumystan shyǵarý júrip jatqanyn jáne ujymnyń basshylyqqa degen senimi joǵalǵanyn alǵa tartqan. Úndeýde Juldyz Súleimenova qyzmetke kelgennen keiin vedomstvodaǵy ahýal kúrt nasharlaǵany aitylǵan. Avtorlardyń sózinshe, burynǵy qalypty jumys atmosferasynyń ornyna qorqynysh, kúizelis pen belgisizdik ornaǵan.
Sondai-aq hatta ministr qyzmetke kirisken alǵashqy kúnderden bastap basshylyq quramdaǵy qyzmetkerler jumystan bosatyla bastaǵany jazylǵan. Úndeý avtorlary qyzmetinen ketken nemese jumystan shyǵarylý aldynda turǵan departament direktorlary men vedomstvoǵa qarasty uiymdardyń basshylaryn da atap ótken.
Budan bólek, hatta ministrdiń basqarý stiline qatysty da syn aitylǵan. Avtorlardyń málimdeýinshe, jinalystar kezinde qyzmetkerlerge emotsiialyq qysym kórsetilip, daýys kóterilip, olardyń jumysy kópshilik aldynda synalady. Sonymen qatar qyzmetkerlerdiń túnge deiin jumys isteýge májbúr bolatyny, demalys kúnderi tapsyrma alatyny jáne «ministrdiń jeke qalaýlaryn oryndaýǵa» mindetteletini aitylǵan.
Úndeý ieleri memleket basshysynan Juldyz Súleimenovany shuǵyl túrde qyzmetinen bosatýdy, anonim túrde kýálik berýge daiyn qyzmetkerlerdi qorǵaýdy jáne ministrliktiń qalypty jumysyn qalpyna keltirýdi suraǵan.
Ministrlik ne dedi?
Oqý-aǵartý ministrligi áleýmettik jelide taraǵan hattyń shyndyqqa janaspaitynyn málimdedi. Vedomstvonyń baspasóz qyzmeti bul qujattyń jalǵan ekenin aityp, onda keltirilgen aqparattyń shyndyqqa sáikes kelmeitinin jetkizdi.
«Áleýmettik jelide ártúrli jańalyq portaldary men blogerler arqyly taraǵan shaǵym resmi tirkelmegen, osyǵan orai ony taratý jáne jariialaý faktileri boiynsha, sot organdary jáne quqyq qorǵaý organdaryna tiisti talap aryzdar joldanatyn bolady», – dep málimdedi ministrliktiń baspasóz qyzmeti.
