Qýandyq Bishimbaevtyń sot otyrysynda sýdia Aijan Kúlbaeva eks-ministrdiń advokattaryn sot zalyna kirgizbei qoidy, - dep habarlaidy Dalanews.kz.
Búgingi sot otyrysynda Bishimbaevtyń qorǵaýshysy Erlan Ǵazymjanov qana qatysyp otyr. Advokat Leila Ramazanova men Nazken Qusaiynova sotqa keshigip kelgendikten sýdia olardy sot zalyna kirgizbei qoidy.
Qusaiynova 10 sáýirde ótken sot otyrysynda búgingi sot otyrysyn saǵat 10.00-da bastaýdy suraǵan. Alaida sýdia onyń ótinishin qanaǵattandyrmai, sot otyrysy ádettegidei saǵat 9.30-da bastalatynyn eskertken bolatyn.
"Buǵan deiingi sot otyrystarynda sotqa keshigip kelýge bolmaityny birneshe ret eskertilgen bolatyn. Sot tikelei efirden kórsetilip jatqandyqtan sot otyrysy 9.30-da bastalatynyn bile tura qorǵaýshylar keshigip keldi. Sondyqtan olar sot zalyna kire almaidy. Sot úzilis jariialaǵan kezde olar sotqa qosyla alady", - deidi sýdia Kúlbaeva.
Aita keteiik, 10 sáýirdegi sot otyrysynda Saltanat Núkenovanyń kómekshisi sotta kýálik etken bolatyn. Saltanat Núkenova astrologiialyq boljamdar boiynsha aqyly keńester ótkizgen. Al Anar Tasova oǵan bul jumysta kómektesken.
Sot otyrysynda kýálik etken Tasova Núkenova men Bishimbaevtyń araqatynasy týraly da aitty. Onyń sózinshe, Núkenova oǵan birneshe ret Bishimbaev jumys isteýge tyiym salǵanyn aitqan. Sonymen qatar, ol byltyr Shymkentte Saltanatpen kezdesken kezde denesinen jaraqat kórgen.
Aita keteiik, 27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Sonymen qatar, Qýandyq Bishimbaev sotta Saltanat Núkenovany asa qatygezdikpen óltirgenin moiyndamady. Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
Sot otyrystarynda oqiǵa bolǵan kezdiń, dálirek, Bishimbaev Saltanatty shashynan súirep, tepkilegen sumdyq kadrlar kórsetildi.
