قۋاندىق بيشىمبايەۆتىڭ سوت وتىرىسىندا سۋديا ايجان كۇلبايەۆا ەكس-مينيستردىڭ ادۆوكاتتارىن سوت زالىنا كىرگىزبەي قويدى، - دەپ حابارلايدى Dalanews.kz. 

بۇگىنگى سوت وتىرىسىندا بيشىمبايەۆتىڭ قورعاۋشىسى ەرلان عازىمجانوۆ قانا قاتىسىپ وتىر. ادۆوكات لەيلا رامازانوۆا مەن نازكەن قۇسايىنوۆا سوتقا كەشىگىپ كەلگەندىكتەن سۋديا ولاردى سوت زالىنا كىرگىزبەي قويدى. 

قۇسايىنوۆا 10 ساۋىردە وتكەن سوت وتىرىسىندا بۇگىنگى سوت وتىرىسىن ساعات 10.00-دا باستاۋدى سۇراعان. الايدا سۋديا ونىڭ ءوتىنىشىن قاناعاتتاندىرماي، سوت وتىرىسى ادەتتەگىدەي ساعات 9.30-دا باستالاتىنىن ەسكەرتكەن بولاتىن. 

"بۇعان دەيىنگى سوت وتىرىستارىندا سوتقا كەشىگىپ كەلۋگە بولمايتىنى بىرنەشە رەت ەسكەرتىلگەن بولاتىن. سوت تىكەلەي ەفيردەن كورسەتىلىپ جاتقاندىقتان سوت وتىرىسى 9.30-دا باستالاتىنىن بىلە تۇرا قورعاۋشىلار كەشىگىپ كەلدى. سوندىقتان ولار سوت زالىنا كىرە المايدى. سوت ءۇزىلىس جاريالاعان كەزدە ولار سوتقا قوسىلا الادى"، - دەيدى سۋديا كۇلبايەۆا. 

ايتا كەتەيىك، 10 ساۋىردەگى سوت وتىرىسىندا سالتانات نۇكەنوۆانىڭ كومەكشىسى سوتتا كۋالىك ەتكەن بولاتىن. سالتانات نۇكەنوۆا استرولوگيالىق بولجامدار بويىنشا اقىلى كەڭەستەر وتكىزگەن. ال انار تاسوۆا وعان بۇل جۇمىستا كومەكتەسكەن. 

سوت وتىرىسىندا كۋالىك ەتكەن تاسوۆا نۇكەنوۆا مەن بيشىمبايەۆتىڭ اراقاتىناسى تۋرالى دا ايتتى. ونىڭ سوزىنشە، نۇكەنوۆا وعان بىرنەشە رەت بيشىمبايەۆ جۇمىس ىستەۋگە تىيىم سالعانىن ايتقان. سونىمەن قاتار، ول بىلتىر شىمكەنتتە سالتاناتپەن كەزدەسكەن كەزدە دەنەسىنەن جاراقات كورگەن.

ايتا كەتەيىك، 27 ناۋرىزدا ەكس-مينيستر قۋاندىق بيشىمبايەۆتىڭ ءىسى بويىنشا القابيلەر تاڭدالعان ەدى. القابيلەر القاسىنا 12 ادام ىرىكتەلدى: 10 – نەگىزگى قۇرام، 2 – قوسالقى. سودان كەيىن اشىق سوت وتىرىستارى باستالدى.

سونىمەن قاتار، قۋاندىق بيشىمبايەۆ سوتتا سالتانات نۇكەنوۆانى اسا قاتىگەزدىكپەن ولتىرگەنىن مويىندامادى. بۇل وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولدى.

سوت وتىرىستارىندا وقيعا بولعان كەزدىڭ، دالىرەك، بيشىمبايەۆ سالتاناتتى شاشىنان سۇيرەپ، تەپكىلەگەن سۇمدىق كادرلار كورسەتىلدى.