Depýtat Oljas Nuraldinov sý tasqyny men basqa da tótenshe jaǵdailar kezinde spýtniktik tehnologiialardy paidalanýdy usyndy, dep habarlaidy Dalanews.kz.
Ol depýtattyq saýalynda gidrologiialyq qyzmetterdiń boljamyna sáikes, biyl eldiń birqatar óńirinde sý tasqyny qaýpi joǵary ekenin aitty. Onyń ishinde Aqmola, Qaraǵandy, Soltústik Qazaqstan, Shyǵys Qazaqstan oblystary jáne Abai oblysy bar.
"Elimizde jyl saiyn bailanystyń turaqsyzdyǵy adamdardy qutqarý jumysyn kúrdelendiretin jaǵdailar bolyp turady. Qys mezgilinde boran men burqasynǵa bailanysty júzdegen shaqyrym jol jabylyp, adamdar eldi mekenderden jáne uialy bailanys turaqty ustaityn aimaqtardan shalǵai jerde qalyp qoiady. Jol apatynan keiin júrgizýshiler men jolaýshylar jedel járdemdi nemese politsiiany der kezinde shaqyra almaityn jaǵdailar da az emes. «Aq jol» demokratiialyq partiiasy shalǵai jáne jetýi qiyn aýmaqtarda spýtniktik bailanys tehnologiialaryn qoldaný qajettigin birneshe ret kótergen edi", – dedi depýtat.
Onyń aitýynsha, búginde Direct-to-Cell dep atalatyn jańa tehnologiia bar. Bul júie qarapaiym 4G/LTE smartfondaryna qosymsha qurylǵysyz-aq tómen orbitaly spýtnikterge tikelei qosylýǵa múmkindik beredi. Sonyń arqasynda habarlama jiberýge, koordinattardy joldaýǵa jáne kómek týraly belgi berýge bolady.
