29 sáýirde Batys Qazaqstan oblysynyń ákimshilik ortalyǵy Oral qalasynda turatyn jýrnalist Raýl Ýporov ózin politsiia áketip bara jatqanyn habarlady. Jýrnalist muny áleýmettik jelidegi paraqshasynda jazdy, dep habarlaidy Dalanews.kz.
"Politsiia pýnktine apara jatyr. Ákimshilik is qozǵamaq", – dep jazdy Ýporov Facebook-tegi paraqshasyna.
Batys Qazaqstan oblysy politsiia departamentiniń baspasóz qyzmeti Azattyqqa jýrnalist Raýl Ýporovtyń ústinen Ákimshilik quqyq buzýshylyq týraly kodekstiń 434-baby ("Usaq buzaqylyq") boiynsha is qozǵalǵanyn habarlady. Politsiia bul iske ne sebep bolǵanyn naqty aitpady.
Keiin Raýl Ýporov politsiia maiory Baiarstanov qol qoiǵan raporttyń fotosyn jariialady. Qujatta Ýporov jýrnalisterdiń sý basqan jerlerden aqparat taratýyna tyiym salynǵany týraly video túsirip, pikir aitqanda balaǵat sóz aralastyryp sóilegen dep jazylǵan. 25 sáýirde politsiia qyzmetkeri basqarma basshysynan osy faktini tirkeýdi suraǵan.
20 sáýirde Batys Qazaqstan oblysy tótenshe jaǵdai departamenti basshysynyń orynbasary Qanat Qarabalaev óńirdegi tasqynǵa qarsy kúres jónindegi shtab basshylyǵy BAQ ókilderine sý basqan jerlerge barýyna jáne ol jerden habar taratýyna tyiym salý týraly sheshim qabyldaǵanyn aitty. Muny "jýrnalisterdiń ómiri men densaýlyǵynyń qaýipsizdigine" qajet shara dep túsindirdi. Kelesi kúni "Prosto jýrnalistika" jobasy avtorlarynyń biri Raýl Ýporov Instagram-stories-te video jariialap, onda jańa ereje týraly aitty, ol "naǵyz jýrnalister ózderi bolýy qajet jerde jumys isteýi kerek" dep málimdedi.
Ýporovtyń aitýynsha, osydan keiin oǵan ýchaskelik politsiia qyzmetkeri kelgen. Sol kezde onyń ústinen shaǵym túskenin aitqan. Tótenshe jaǵdai departamenti ázirshe bul oqiǵa jóninde pikir bildirmedi.
