29 ساۋىردە باتىس قازاقستان وبلىسىنىڭ اكىمشىلىك ورتالىعى ورال قالاسىندا تۇراتىن جۋرناليست راۋل ۋپوروۆ ءوزىن پوليسيا اكەتىپ بارا جاتقانىن حابارلادى. جۋرناليست مۇنى الەۋمەتتىك جەلىدەگى پاراقشاسىندا جازدى، دەپ حابارلايدى Dalanews.kz.
"پوليسيا پۋنكتىنە اپارا جاتىر. اكىمشىلىك ءىس قوزعاماق"، – دەپ جازدى ۋپوروۆ Facebook-تەگى پاراقشاسىنا.
باتىس قازاقستان وبلىسى پوليسيا دەپارتامەنتىنىڭ باسپا ءسوز قىزمەتى ازاتتىققا جۋرناليست راۋل ۋپوروۆتىڭ ۇستىنەن اكىمشىلىك قۇقىق بۇزۋشىلىق تۋرالى كودەكستىڭ 434-بابى ("ۇساق بۇزاقىلىق") بويىنشا ءىس قوزعالعانىن حابارلادى. پوليسيا بۇل ىسكە نە سەبەپ بولعانىن ناقتى ايتپادى.
كەيىن راۋل ۋپوروۆ پوليسيا مايورى بايارستانوۆ قول قويعان راپورتتىڭ فوتوسىن جاريالادى. قۇجاتتا ۋپوروۆ جۋرناليستەردىڭ سۋ باسقان جەرلەردەن اقپارات تاراتۋىنا تىيىم سالىنعانى تۋرالى ۆيدەو ءتۇسىرىپ، پىكىر ايتقاندا بالاعات ءسوز ارالاستىرىپ سويلەگەن دەپ جازىلعان. 25 ساۋىردە پوليسيا قىزمەتكەرى باسقارما باسشىسىنان وسى فاكتىنى تىركەۋدى سۇراعان.
20 ساۋىردە باتىس قازاقستان وبلىسى توتەنشە جاعداي دەپارتامەنتى باسشىسىنىڭ ورىنباسارى قانات قارابالايەۆ وڭىردەگى تاسقىنعا قارسى كۇرەس جونىندەگى شتاب باسشىلىعى ب ا ق وكىلدەرىنە سۋ باسقان جەرلەرگە بارۋىنا جانە ول جەردەن حابار تاراتۋىنا تىيىم سالۋ تۋرالى شەشىم قابىلداعانىن ايتتى. مۇنى "جۋرناليستەردىڭ ءومىرى مەن دەنساۋلىعىنىڭ قاۋىپسىزدىگىنە" قاجەت شارا دەپ ءتۇسىندىردى. كەلەسى كۇنى "پروستو جۋرناليستيكا" جوباسى اۆتورلارىنىڭ ءبىرى راۋل ۋپوروۆ Instagram-stories-تە ۆيدەو جاريالاپ، وندا جاڭا ەرەجە تۋرالى ايتتى، ول "ناعىز جۋرناليستەر وزدەرى بولۋى قاجەت جەردە جۇمىس ىستەۋى كەرەك" دەپ مالىمدەدى.
ۋپوروۆتىڭ ايتۋىنشا، وسىدان كەيىن وعان ۋچاسكەلىك پوليسيا قىزمەتكەرى كەلگەن. سول كەزدە ونىڭ ۇستىنەن شاعىم تۇسكەنىن ايتقان. توتەنشە جاعداي دەپارتامەنتى ازىرشە بۇل وقيعا جونىندە پىكىر بىلدىرمەدى.
