Aqtóbe oblysynda Besqospa aýylynan 200 adam qaýipsiz jerge kóshirildi, - dep habarlaidy Dalanews.kz.
Óńirde Maǵajan sý qoimasy bógeti buzylýyna, bógetti jaǵalai ornalasqan eldi mekenderdi sý basý qaýpi bolýyna bailanysty Besqospa aýylynyń turǵyndary qaýipsiz jerge kóshirilip jatyr.
Oblystyq ákimdik málimetinshe, qazir aýyl turǵyndary Ulttyq ulanǵa qarasty Mi-171E tikushaǵyna otyrǵyzylyp, Besqospa aýylynan Bestamaqqa jetkizilip jatyr. Azamattar Bestamaq aýylyndaǵy mádeniet úiine avtobýstarmen de tasymaldanyp jatyr.
Saǵat 13:30-daǵy aqparatqa súiensek, avtobýs 6 reis jasaǵan. Nátijesinde 200 adam tasymaldanǵan, al 80-i - bala.
"Evakýatsiia kezinde turǵyndardan qutqarýshylar, jergilikti atqarýshy organdar tarapynan aitylatyn habarlandyrý, eskertýlerge qulaq asyp, qajet qujattaryńyzdy alyp, úilerińizdi bosatýlaryńyzdy suraimyz", dep eskertti qutqarýshylar.
"Aqtóbe sý qoimasynyń tolýyna bailanysty shliýzdi ashýǵa májbúrmiz. Bul sýdyń jaǵasynan asyp ketýine ákelýi múmkin ekenin eskertemiz. Kirpishti kópiri aýdanyndaǵy Elek ózeni men Qarǵaly ózeniniń mańynda ornalasqan baý-baqsha ujymdarynyń turǵyndaryn evakýatsiialaýǵa kelisim berip, úilerińizden shyǵýdy suraimyn.
Biz úshin sizderdiń ómirlerińiz óte mańyzdy. Ózderińiz bilesizder, naýryzdyń 26-sy kúni qala aýmaǵynda kún kúrt jylynýyna bailanysty sý kóterildi. Birneshe turǵyn alap pen baý-baqsha ujymdaryna qaýip tóndi. Búgingi kúni 73 úige sý kirdi. 155 adam evakýatsiialandy. Sý tasqyny saldarynan zardap shekken turǵyndarǵa kómek beriledi", – dedi ákim.
Artynsha qala ákimi evakýatsiialyq pýnktterge baryp, túnde sý basý qaýpine bailanysty úilerin tastap shyqqan turǵyndarmen kezdesip qaitqan.
"Ózderińiz biletindei, Aqtóbe qalasynda tótenshe jaǵdai jariialandy. Biz keshe túnde sý tasqyny bolýy múmkin aimaqtarda turatyn azamattardy evakýatsiialadyq. Úilerin sý basqan turǵyndar kómeksiz qalmaidy, jariialanǵan tótenshe jaǵdai aiasynda kómek beriledi. Osy sý tasqynyna qarsy sharalar aiaqtalyp, biryńǵailanǵannan keiin komissiia ár úidiń jaǵdaiyn qaraýmen ainalysatyn bolady. Zardap shekkenderdiń eshqaisysy nazardan tys qalmaidy.
Evakýatsiialyq jáne sý tasqynyna qarsy is-sharalarǵa 835 adam, 340 tehnika jumyldyryldy. Qazirgi ýaqytqa 2125 adam, onyń ishinde 870 bala qalanyń 53 mektebinde ornalasty. Ystyq tamaq uiymdastyrylǵan", - dedi ákim.
