بۇعان دەيىن اقتوبە قالاسىنىڭ اكىمى ازامات بەكەت سۋ تاسقىنىنا بايلانىستى تۇرعىندارعا ەسكەرتۋ جاساپ، ءۇن قاتتى. ازامات بەكەتتىڭ سوزىنشە، حرومتاۋ اۋماعىندا ورنالاسقان ماعاجان سۋ قويماسى جارىلىپ كەتۋ ءقاۋپى بار. وسىعان بايلانىستى اقتوبە سۋ قويماسىنا ۇلكەن كولەمدە سۋ قۇيىلادى دەگەن بولجام بار.

"اقتوبە سۋ قويماسىنىڭ تولۋىنا بايلانىستى ءشليۋزدى اشۋعا ءماجبۇرمىز. بۇل سۋدىڭ جاعاسىنان اسىپ كەتۋىنە اكەلۋى مۇمكىن ەكەنىن ەسكەرتەمىز. كىرپىشتى كوپىرى اۋدانىنداعى ەلەك وزەنى مەن قارعالى وزەنىنىڭ ماڭىندا ورنالاسقان باۋ-باقشا ۇجىمدارىنىڭ تۇرعىندارىن ەۆاكۋاسيالاۋعا كەلىسىم بەرىپ، ۇيلەرىڭىزدەن شىعۋدى سۇرايمىن.

ءبىز ءۇشىن سىزدەردىڭ ومىرلەرىڭىز وتە ماڭىزدى. وزدەرىڭىز بىلەسىزدەر، ناۋرىزدىڭ 26-سى كۇنى قالا اۋماعىندا كۇن كۇرت جىلىنۋىنا بايلانىستى سۋ كوتەرىلدى. بىرنەشە تۇرعىن الاپ پەن باۋ-باقشا ۇجىمدارىنا ءقاۋىپ ءتوندى. بۇگىنگى كۇنى 73 ۇيگە سۋ كىردى. 155 ادام ەۆاكۋاسيالاندى. سۋ تاسقىنى سالدارىنان زارداپ شەككەن تۇرعىندارعا كومەك بەرىلەدى"، – دەدى اكىم.

ارتىنشا قالا اكىمى ەۆاكۋاسيالىق پۋنكتتەرگە بارىپ، تۇندە سۋ باسۋ قاۋپىنە بايلانىستى ۇيلەرىن تاستاپ شىققان تۇرعىندارمەن كەزدەسىپ قايتقان.

"وزدەرىڭىز بىلەتىندەي، اقتوبە قالاسىندا توتەنشە جاعداي جاريالاندى. ءبىز كەشە تۇندە سۋ تاسقىنى بولۋى مۇمكىن ايماقتاردا تۇراتىن ازاماتتاردى ەۆاكۋاسيالادىق. ۇيلەرىن سۋ باسقان تۇرعىندار كومەكسىز قالمايدى، جاريالانعان توتەنشە جاعداي اياسىندا كومەك بەرىلەدى. وسى سۋ تاسقىنىنا قارسى شارالار اياقتالىپ، ءبىرىڭعايلانعاننان كەيىن كوميسسيا ءار ءۇيدىڭ جاعدايىن قاراۋمەن اينالىساتىن بولادى. زارداپ شەككەندەردىڭ ەشقايسىسى نازاردان تىس قالمايدى.

ەۆاكۋاسيالىق جانە سۋ تاسقىنىنا قارسى ءىس-شارالارعا 835 ادام، 340 تەحنيكا جۇمىلدىرىلدى. قازىرگى ۋاقىتقا 2125 ادام، ونىڭ ىشىندە 870 بالا قالانىڭ 53 مەكتەبىندە ورنالاستى. ىستىق تاماق ۇيىمداستىرىلعان"، - دەدى اكىم.