Karantinde qamalyp, kópten beri kórispegen máslihat depýtattary arqa-jarqa, máz- meiram. Qushaqtasyp súiispese de, ara qashyqtyq saqtap, judyryq soǵystyryp, amandyq bilisip jatty. Elordanyń atynan Senatqa barýǵa úmittilerge 20 adam daýys berdi. Bul kisiler "Bizge eshkim qysym jasaǵan joq, jasai da almaidy" deidi.
Qaiyrly Taýken, Nur-Sultan qalalyq máslihatynyń depýtaty:
"Máslihat depýtaty óz erkimen kimdi qalaidy sol adamǵa óz erkimen daýys beredi. Tapsyrma berýi múmkin emes. Biz erikti depýtattarmyz ǵoi".
Keiingi ýaqytta qoǵamda qos palataly Parlamenttiń qajeti qansha degen suraq kóptep talqylanýda. Miras Shekenov "oibai-aý, onyń orny bólek" degen pikirde.
Miras Shakenov, Nur-Sultan qalalyq máslihatynyń depýtaty:
"Men qos palataly júieni qoldaimyn. Nege deisizder ǵoi? Májilis pen onyń depýtattaryna syilastyqpen qaraimyn, biraq bilik júiesinde belgili bir balans bolýy kerek. Bul kez kelgen bilik satysyna qatysty másele. Parlamentke keletin bolsaq, joǵary palata mindetti túrde kerek dep esepteimin".
Áne-mine degenshe jáshik ashylyp, kabinalarǵa máslihattyqtar birinen soń biri kirip, jasyryn túrde daýys bere bastady. Sailaýshylardyń qatarynda úmitker Aqylbek Kúrishbaev ta bar. Kezinde Aýyl sharýshylyǵy ministri bolǵan, keiingi qyzmeti rektor. Kimge daýys berdińiz dep suramadyq. Aqyry komissiia músheleri biýlletenderdi sanai bastady.
Osylaisha eń kóp daýys jinap, astana atynan Aqylbek Kúrishbaev senatqa joldama aldy. Áýel basta negizgi kandidat osy kisi, qalǵan ekeýi sailaýdyń sánin kirgizer sándidat bolǵan siiaqty. Sý jańa senator biýlletender sanalyp jatqanda Ázirbaijan elshisimen áńgimelesip turdy. Júzinde alańdaýshylyq joq.
Aqylbek Kúrishbaev, sý jańa senator:
"Ia je ne mogý kak molodoi chelovek prygat. Ia tem bolee v maske nahojýs. Mne konechno bylo priiatno. Ia jdal etogo momenta".
Osy sátti kúttim degen Aqylbek Kúrishbaev jańa qyzmetke daiyn eken. Birinshi kúnnen bastap qulshyna kirispekshi. Atqarýshy biliktiń qazirgi jumysy kóńilinen shyqpaitynyn da aityp qaldy.
Aqylbek Kúrishbaev, sý jańa senator:
"Senattyń basshylary sheshedi. Biraq, meniń usynysym agrarlyq, ǵalym retinde osy salanyń mamany retinde agrarlyq salaǵa barǵym keledi. Menińshe, bizge qazir eń keregi myna memlekettik qyzmetti kúsheitýimiz kerek. Memlekettik basqarý júieni kusheitýimiz kerek. Al eger Parlamentimizdi myqty, yqpaldy bolsa Úkimet te ózgeredi. Soǵan jumys isteýimiz kerek".
Qazirgi memlekettik basqarý júiesine kóńińiz tolmai ma?
"Tolmaidy, tolmaidy".
Senat depýtattaryn sailaý 14 oblysta jáne respýblikalyq mańyzy bar 3 qalada ótti. Senattaǵy 17 orynǵa ótetinderdi el boiynsha 3069 máslihat depýtaty anyqtady. Óńirlerdegi sharanyń ótýi barysyna qatysty sipattama da ortaq.
Erlan Tatimov, Aqtóbe qalalyq máslihatynyń depýtaty:
"Daýys berdik. Jalpy ótkizgen is-shara joǵary dárejede. Uiymdastyrýǵa da, uiymdastyrýshylarǵa da alǵysymyz zor".
Jumamurat Shámshi, qoǵam belsendisi:
"Bizde birden eshkim tanymaityn adamdy qonjitady senator qylyp. Ol eshteńeden habary joq. Ol qaidan kelgen adam. Biz tanymaimyz".
Senatqa ótkenderdiń aty-jónin kópshilik bilmese de, qazirgi qyzmetteri olardyń bedeli týraly aityp tur deidi qoǵam belsendisi. Mysaly, Nur-Sultannan sailanǵan Kúrishbaev rektor, Almatydan ótken Mákejanov aýdan ákimi, Shymkentte jeńgen Qapbarova taǵy da senator atandy. Aqtóbe, Shyǵys, Soltústik, Batys, Túrkistan oblystary. Qai óńirdi alsań da baǵy janǵandardyń deni ne ákim, ne rektor, ne biznesmen.
Al saiasattanýshy Qazybek Maigeldinov bul saiasi reformaǵa keri áser etedi deidi. Ortaq tanysty úmitker etip, Joǵary palataǵa sailaǵannan eshteńe ózgermeitinin aitady.
Qazybek Maigeldinov, saiasattanýshy:
"Máslihattyń negizgi quramy ózgermegen. Sol baiaǵy máslihat. Sol baiaǵy eshkimge belgisiz depýtattar. Jáne olardyń qazirgi tańda óz qatarynan shyǵaryp otyrǵan kanditattary solardyń qatarynda júrgen adamdar. Eshqandai jańashyldyq joq. Al ústinen ózgeris jasamai, astynan ózgeris jasaǵannan keiin keiinnen Senat Májilis pen Máslihat sailaýy ótkennen keiin taǵy da 5 jyl, ekinshi srokqa sailanýǵa quqyqtary bar senatorlardyń".
Bul endi aldaǵy kúnniń isi. Osy joly senatorlar eski ádispen sailandy. Al olardyń qanshalyqty belsenip, halyqqa qyzmet etetinin aldaǵy ýaqyt kórseter.
https://www.youtube.com/watch?time_continue=173&v=7x-eqSA4Log&feature=emb_title
