Soltústik Qazaqstan oblysynyń prokýrorlary shetel azamattaryna jeke sáıkestendirý nómirlerin berý kezinde zań buzýshylyqtardy anyqtady, dep habarlaıdy Dalanews.kz.
Tekserý nátıjesinde belgili bolǵandaı, “Azamattarǵa arnalǵan úkimet” memlekettik korporasıasynyń oblystyq fılıaly zań talaptaryn elemeı, Qazaqstan aýmaǵynda bolmaǵan sheteldikterdiń atynan 720 ótinish rásimdegen. Osylaısha, olarǵa zańsyz túrde jeke sáıkestendirý nómirleri berilgen.
Prokýratýranyń qadaǵalaý aktisinen keıin kináliler jaýapkershilikke tartylyp, zańsyz berilgen JSN-derdi joıý sharalary qolǵa alyndy.
Sonymen qatar 3 shildede qadaǵalaý organynyń materıaldary negizinde Petropavl qalasy men M.Jumabaev aýdanynyń polısıa bólimderi Qylmystyq kodekstiń 206-babynyń 2-bóligi («Aqparatty zańsyz joıý nemese ózgertý») boıynsha sotqa deıingi tergeýdi bastady.
Qazirgi ýaqytta tergeý amaldary júrip jatyr. Onyń barysy oblys prokýratýrasynyń qatań baqylaýynda.
