Soltústik Qazaqstan oblysynyń ákimi Jumysshy kentindegi jedel shtabta boldy, dep habarlaidy Dalanews.kz
Aimaqta kúnniń kúrt jylynýyna bailanysty qardyń qarqyndy erýi bastaldy. Sý tasqyny kezeńiniń basynda Jumysshy kentindegi erigen qar sýlary qaýip tóndiredi. SQO ákimi Ǵaýez Nurmuhambetov osy aýdanda ornalasqan jedel shtabta bolyp,turǵyn úilerdi sý basý qaýpin tómendetý boiynsha júrgizilip jatqan sharalar týraly baiandamalardy tyńdady.
Sonymen qatar, óńir basshysy áleýmettik jeliler men BAQ arqyly qar shyǵarýǵa kómek suraǵan Ýniversalnaia kóshesindegi jeke turǵyn úige arnaiy baryp, úi ielerimen kezdesti. Ǵaýez Nurmuhambetov Petropavl ákimine tańǵa deiin úidiń ainalasyndaǵy qardy shyǵarý týraly tapsyrma berdi. Al turǵyndar óz aýlasyndaǵy qardy ózderi tazalaýy qajet. Bul másele oblys ákiminiń jeke baqylaýynda.
Jalpy, turǵyndardyń ótinishterine jedel jaýap berý úshin qala ákimdigi men TJ bóliminiń táýlik boiy kezekshiligi uiymdastyryldy. Sondai-aq, ótinishterdi qabyldaityn ortalyq dispetcherlik qyzmet quryldy. Qazirgi ýaqytta qalalyq qyzmetter sý sorý jumystaryn belsendi júrgizýde. Qosymsha 50 jańa motopompa satyp alynyp, olardyń jalpy sany 92 birlikke jetti.
"Qala basshylyǵyna jáne barlyq kommýnaldyq qyzmetterge táýlik boiy jumys rejimine kóshýdi tapsyrdym. Turǵyn úilerdi sý basýdyń aldyn alý úshin sý sorý jáne qar shyǵarýdy barynsha jedeldetý qajet", - dep jazdy óńir basshysy áleýmettik jelide.
