Soltústik Qazaqstan oblysynyń prokýrorlary biýdjettiń negizsiz shyǵyndarynyń aldyn aldy, dep habarlaidy Dalanews.kz.
Qadaǵalaý organy tekserýler sheńberinde tsifrlandyrýǵa bólingen biýdjet qarajatynyń negizsiz jumsalýynan kórinis tapqan óreskel buzýshylyqtardy anyqtady.
Aiyrtaý, Aqjar, Esil, Mamliýt, Taiynsha, Ýálihanov aýdandarynyń jáne Ǵ.Músirepov atyndaǵy, Shal aqyn aýdandarynyń bilim bólimderiniń laýazymdy tulǵalary Biýdjet kodeksiniń talaptaryn jáne Memlekettik satyp alýdy júzege asyrý qaǵidalaryn buza otyryp, bilim berý mekemelerin (mektepterdi) internet jelisine qosý boiynsha qyzmetter kórsetýge 360 mln teńgeden astam somaǵa sharttar jasasty.
Bul rette naqty kórsetilgen qyzmetter tehnikalyq erekshelikterde kórsetilgen sipattamalarǵa sáikes kelmedi.
Aqjar aýdanynda «Pedagog mártebesi týraly» QR Zańynyń talaptaryna qaishy, Gorkii orta mektebiniń muǵalimderi roýtordy óz qarajaty esebinen tóledi, óitkeni berilgen internet tómen jyldamdyqqa bailanysty parametrlerge sáikes kelmedi.
Prokýrorlyq qadaǵalaý aktileri boiynsha kináli laýazymdy tulǵalar tártiptik jaýapkershilikke tartyldy, qyzmetter qunyn tómendetý týraly qosymsha kelisimder jasaldy, bul biýdjet qarajatynyń 75,8 mln teńge somasyna negizsiz shyǵystarynyń aldyn alýǵa múmkindik berdi.
Oblys prokýratýrasy biýdjet qarajatyn jumsaý kezinde zańdylyqty qamtamasyz etý boiynsha jumysty jalǵastyrýda.
