Shyǵys Qazaqstan oblysynda pornografiialyq materialdar daiyndap, taratqan jáne jynystyq sipattaǵy qyzmet kórsetý oryndaryn ustaǵan 14 adam sottaldy, dep habarlaidy dalanews.kz.
Is Óskemen qalasynyń qylmystyq ister jónindegi aýdanaralyq sotynda qaralǵan. Sottalýshylar pornografiialyq materialdardy zańsyz daiyndaý, taratý jáne jarnamalaý, sondai-aq pornografiialyq sipattaǵy beinematerialdardy zańsyz satýmen ainalysty dep aiyptalǵan.
Sot materialdaryna sáikes, olardyń bir bóligi telekommýnikatsiia jelilerin, sonyń ishinde internetti paidalanyp, jynystyq sipattaǵy qyzmetter kórsetýge arnalǵan pritondardy ustaǵan. Sottalýshylardyń birine uiymdasqan top quryp, oǵan basshylyq etý, taǵy birnesheýine osy topqa qatysý aiyby taǵylǵan.
Barlyq sottalýshy óz kinásin tolyq moiyndap, prokýratýramen kináni moiyndaý týraly mámile túrindegi protsestik kelisimder jasaǵan.
Sot qylmystyq quqyq buzýshylyqtardyń jiyntyǵyn jáne basqa da mán-jailardy erekshe dep tanyp, Qylmystyq kodekstiń 55-babynyń 4-bóligin qoldanǵan. Sonyń nátijesinde tiisti baptardyń sanktsiialarynda kózdelgen jazanyń eń tómengi sheginen tómen jaza taǵaiyndaldy.
Sot úkimi boiynsha bir adam 5 jylǵa, 11 adam 3 jylǵa, taǵy eki adam 2 jyl 6 aiǵa jáne 2 jyl 8 aiǵa bas bostandyǵynan aiyryldy.
Kámeletke tolmaǵan balalary bar úsh sottalýshyǵa Qylmystyq kodekstiń 74-baby negizinde jazany óteý 5 jylǵa keiinge qaldyryldy. Qalǵandary jazasyn qylmystyq-atqarý júiesiniń ortasha qaýipsizdik mekemelerinde óteidi.
