Óz kezeginde Britan úkimeti kiber shabýyldar jáne ziiatkerlik menshikti urlaý jónindegi kez-kelgen aqparatqa salmaqty qaraitynyn málimdedi.
Bul týraly Britaniia premer-ministriniń ókili The Sun basylymyndaǵy málimetter boiynsha jaýap berip jatyp aitty.
Ol arnaiy qyzmettiń isine qatysty suraqtarǵa jaýap bermeitinin aityp, Reseige eshqandai aiyptaý taqpady.
Bir kún buryn The Sun basylymy reseilik tyńshylar AstraZeneca kompaniiasynyń koronavirýsqa qarsy vaktsina óndirý formýlasyn urlap ketkenin, ol keiin "Cpýtnik V" vaktsinasyn óndirý úshin paidalanǵanyn habarlaǵan.
Aqparatqa qaraǵanda, bul týraly arnaiy qyzmet jaqynda britan úkimetine málimet bergen.
Eki vaktsina – britaniialyq, reseilik te – adenovirýstyq vaktsina bolyp esepteledi, ázirlenýi de uqsas. Biraq AstraZeneca-nyń "Cpýtnik V" vaktsinasynan aiyrmashylyǵy - shimpanze adenovirýsy negizinde ázirlengen. "Spýtnik V" Reseide 2020 jyldyń tamyzynda, AstraZeneca Britaniiada jeltoqsan aiynda tirkeýge alynǵan.
Byltyr Batys elderiniń arnaiy qyzmeti vaktsina týraly málimetter alý úshin reseilik hakerler kibershabýyldar jasaǵanyn málimdegen.
Basylymǵa pikir bildirgen Britan biliginiń ókili vaktsinaǵa qatysty qupiia málimet farmatsevtikalyq kompaniiadan nemese zerthanadan taraǵanyn rastaǵan.
Eldiń Ishki ister ministri Demian Haindstyń atap ótkenindei, Ulybritaniiaǵa qarsy kibershabýyldar jyl ótken saiyn jiilep keledi.
"Óndiristik, ekonomikalyq baǵyttaǵy tyńshylyqqa tejeý qoiý kerek. Mundaiǵa ábden mashyqtanǵan shpiondardyń qýlyǵyna quryq boilamaidy. Ulybritaniianyń kommertsiialyq qupiiasyn áshkerelep, jasyryn, qundy málimetti qolǵa túsirgisi keletin shet memleketter bar ekeni jasyryn emes", – deidi ol.
Aita ketelik, ótken jyldyń naýryz aiynda britan barlaý qyzmeti reseilik hakerlerdiń Oksford ýniversitetine birneshe márte shabýyl jasaǵanyn málimdegen.
Shabýyl merzimi ýniversitet ǵalymdarynyń koronavirýsqa qarsy vaktsinany oilap tapqan ýaqytymen tuspa-tus kelgen. Byltyrǵy jyldyń sáýir aiynda Oksford ǵalymdary AstraZeneka -ny synaý tájiribesine kirisken edi. Artynsha, bir aidan keiin reseilik ǵalymdar COVID-19-ǵa qarsy vaktsina ázirlegenin habarlaǵan.
Kreml joǵarydaǵy málimetterdi ádettegidei joqqa shyǵardy. Pýtinniń baspasóz hatshysy Dmitrii Peskov buǵan jaýap berip jatyp, "The Sun ǵylymi emes basylym" degen.
