ءوز كەزەگىندە بريتان ۇكىمەتى كيبەر شابۋىلدار جانە زياتكەرلىك مەنشىكتى ۇرلاۋ جونىندەگى كەز-كەلگەن اقپاراتقا سالماقتى قارايتىنىن مالىمدەدى.
بۇل تۋرالى بريتانيا پرەمەر-مينيسترىنىڭ وكىلى The Sun باسىلىمىنداعى مالىمەتتەر بويىنشا جاۋاپ بەرىپ جاتىپ ايتتى.
ول ارنايى قىزمەتتىڭ ىسىنە قاتىستى سۇراقتارعا جاۋاپ بەرمەيتىنىن ايتىپ، رەسەيگە ەشقانداي ايىپتاۋ تاقپادى.
ءبىر كۇن بۇرىن The Sun باسىلىمى رەسەيلىك تىڭشىلار AstraZeneca كومپانياسىنىڭ كوروناۆيرۋسقا قارسى ۆاكسينا ءوندىرۋ فورمۋلاسىن ۇرلاپ كەتكەنىن، ول كەيىن "Cپۋتنيك V" ۆاكسيناسىن ءوندىرۋ ءۇشىن پايدالانعانىن حابارلاعان.
اقپاراتقا قاراعاندا، بۇل تۋرالى ارنايى قىزمەت جاقىندا بريتان ۇكىمەتىنە مالىمەت بەرگەن.
ەكى ۆاكسينا – بريتانيالىق، رەسەيلىك تە – ادەنوۆيرۋستىق ۆاكسينا بولىپ ەسەپتەلەدى، ازىرلەنۋى دە ۇقساس. ءبىراق AstraZeneca-نىڭ "Cپۋتنيك V" ۆاكسيناسىنان ايىرماشىلىعى - شيمپانزە ادەنوۆيرۋسى نەگىزىندە ازىرلەنگەن. "سپۋتنيك V" رەسەيدە 2020 جىلدىڭ تامىزىندا، AstraZeneca بريتانيادا جەلتوقسان ايىندا تىركەۋگە الىنعان.
بىلتىر باتىس ەلدەرىنىڭ ارنايى قىزمەتى ۆاكسينا تۋرالى مالىمەتتەر الۋ ءۇشىن رەسەيلىك حاكەرلەر كيبەرشابۋىلدار جاساعانىن مالىمدەگەن.
باسىلىمعا پىكىر بىلدىرگەن بريتان بيلىگىنىڭ وكىلى ۆاكسيناعا قاتىستى قۇپيا مالىمەت فارماسيەۆتيكالىق كومپانيادان نەمەسە زەرتحانادان تاراعانىن راستاعان.
ەلدىڭ ىشكى ىستەر ءمينيسترى دەميان حايندستىڭ اتاپ وتكەنىندەي، ۇلىبريتانياعا قارسى كيبەرشابۋىلدار جىل وتكەن سايىن جيىلەپ كەلەدى.
"وندىرىستىك، ەكونوميكالىق باعىتتاعى تىڭشىلىققا تەجەۋ قويۋ كەرەك. مۇندايعا ابدەن ماشىقتانعان شپيونداردىڭ قۋلىعىنا قۇرىق بويلامايدى. ۇلىبريتانيانىڭ كوممەرسيالىق قۇپياسىن اشكەرەلەپ، جاسىرىن، قۇندى مالىمەتتى قولعا تۇسىرگىسى كەلەتىن شەت مەملەكەتتەر بار ەكەنى جاسىرىن ەمەس"، – دەيدى ول.
ايتا كەتەلىك، وتكەن جىلدىڭ ناۋرىز ايىندا بريتان بارلاۋ قىزمەتى رەسەيلىك حاكەرلەردىڭ وكسفورد ۋنيۆەرسيتەتىنە بىرنەشە مارتە شابۋىل جاساعانىن مالىمدەگەن.
شابۋىل مەرزىمى ۋنيۆەرسيتەت عالىمدارىنىڭ كوروناۆيرۋسقا قارسى ۆاكسينانى ويلاپ تاپقان ۋاقىتىمەن تۇسپا-تۇس كەلگەن. بىلتىرعى جىلدىڭ ءساۋىر ايىندا وكسفورد عالىمدارى AstraZeneka -نى سىناۋ تاجىريبەسىنە كىرىسكەن ەدى. ارتىنشا، ءبىر ايدان كەيىن رەسەيلىك عالىمدار COVID-19-عا قارسى ۆاكسينا ازىرلەگەنىن حابارلاعان.
كرەمل جوعارىداعى مالىمەتتەردى ادەتتەگىدەي جوققا شىعاردى. ءپۋتيننىڭ باسپا ءسوز حاتشىسى دميتريي پەسكوۆ بۇعان جاۋاپ بەرىپ جاتىپ، "The Sun عىلىمي ەمەس باسىلىم" دەگەن.
