Jýrnalıs Arman Áýbákirov sport salasyn jat dinı ıdeologıa jaýlap alǵanyn aıtty, - dep habarlaıdy Dalanews.kz.
Jýrnalısiń sózinshe, sportshylardyń tarıh pen mádenıetti, saıasatty bilýi óte sırek kezdesetin qubylys.
"Sondyqtan, olardyń qurýly turǵan tuzaqqa túsýi op-ońaı. Eldos altyn alǵan kúni "bizdiń jamaǵattyń ókili jeńiske jetti" dep maqtanǵandaı onyń sájde jasap jatqan sýretin jarysa taratqandar kimder? Sájdege basyn tıgizgen adam osyndaı jetistikke jetedi degendeı ıshara, astyrtyn ıdeologıalyq nasıhat qatty júrdi. Eger másele dinde bolsa, ótken jolǵy olımpıadada nege bir altyn almadyq? "Allahtyń qalaýymen" dep barlyǵy saqal sıpap qur qaıtqan joq pa? Ras, Eldos tabandy jigit. Qajyrly eńbegimen asý bermes belesti baǵyndyrdy.
Óz-ózin dáleldedi. Allahtyń emes, eńbektiń arqasy. Daıyndalmasa, úzdiksiz jattyqpasa, Allah oǵan dym da bermes edi. Din jolynda bolsa da, bolmasa da árbir qazaqtyń jetistigine qýanamyz. Óıtkeni biz eń birinshi qazaqpyz. Al endi ony jalpy qazaqtan bólektep, jamaǵattyń ókili retinde ıdeologıalyq nasıhat quralyna aınaldyrý - asa qaýipti úrdis. Onsyz da din shyrmaýyna túsken sport salasyn odan saıyn qara tunekke batyrý desek te bolady. Bárimiz bir qazaqpyz. Árýaq dep babalarymyz jaýǵa shapqan. Tegimizdi, tamyrymyzdy umytpaıyq. Sportshylarǵa tarıh pen ulttyq mádenıetti oqytý kerek-aý", - dep jazdy jýrnalıs .
Eske salaıyq, 27 shildede Ulttyq qurama kóshbasshysy Eldos Smetov (60 kg) Parıj Olımpıadasynyń fınalynda altyn medaldi jeńip aldy.
Qazaq palýany Parıjdegi oıyndardyń fınalynda Lýka Mheıdzemen (Fransıa) kúresip, qarsylasynan basym tústi.
Osylaısha, Eldos Smetov olımp shyńyn baǵyndyryp, esimin qazaq sporty tarıhyna altyn árippen qashap jazdy.
Tarazdyq tatamı sheberi osyǵan deıin 2016 jyly Rıo Olımpıadasynda fınalǵa shyqqanymen qarsylasyna ese jiberip, kúmispen kúptelgen. Al Tokıodaǵy oıyndarda Tornıke Chkadýany jyǵyp, úzdik úshtikti túıindegen. Al búgin Eldos ómirindegi basty beldesýde bar sheberligin pash etti.
