Sozaq aýylynyń «Sozaq» mektep-gımnazıasynyń 20 jyl burynǵy túlekteri qaıyrymdylyq jasap jalǵyzbasty anaǵa turǵyn úı salyp berdi. Tórt bólmeli úıde aýyz sý, jaryq jáne jylý júıesi ornatylǵan. Sońǵy úlgidegi zamanaýı quraldarmen jabdyqtalǵan. Aýlasy da árlengen, – dep habarlaıdy Dalanews.kz Túrkistan oblysynyń Óńirlik komýnıkasıalar qyzmetine silteme jasap.

Jańa baspanaǵa ıe bolǵan jalǵyzbasty ana Salamat Eralıeva qýanyshymen bólisip, jerlesterine alǵysyn bildirdi. Sondaı-aq, mektepti 2001 jyly bitirgen túlekter aýylda fýtboldan jarys uıymdastyrdy. Ómirden erte qaıtqan synyptastarynyń rýhtaryna Quran baǵyshtady. İs-sharanyń barshasy da karantın talaptaryn saqtaı otyryp ótkizilgen.

Jalpy sozaqtyq mektep bitirýshi túlekter 20 jyldyq merekelerine oraı demeýshilik jasap, týǵan jerdiń túleýine óz úlesterin qosyp keledi. Máselen, byltyrǵy jyly salynǵan bir úı kópbalaly jalǵyzbasty anaǵa berilgen. Túlekterdiń qolǵa alýymen bıyl Sozaq aýylynda úsh úı boı kóterýde. Sonymen qatar, buǵan deıin aýyldyń kire-berisine kıiz úı men aýyl ortalyǵyna báıterektiń músini ornatylǵan bolatyn.