Ile aýdandyq sotynda qaralyp jatqan atyshýly iske qatysýshylar sýdia áreketterine narazylyq bildirdi. Sotta advokattar men jábirlenýshi tarap suraq qoiý quqyǵy shektelgenin aityp otyr, dep habarlaidy Dalanews.kz.
Bul týraly advokat Sáýle Qobjanova habarlady.
25 jyldyq tájiribesi bar advokat alǵash ret – ári bir emes, eki márte – sýdiaǵa qarsy otvod (qarsylyq) bildirýge májbúr boldy. Bul – Ile aýdandyq sotynda qaralyp jatqan is kezinde oryn aldy. Jábirlenýshi tarap – kólik qaǵyp óltirgen azamattyń týǵan ápkesi – sot áreketterin "baýyrynyń rýhyn qorlaý" dep baǵalady.
Másele – tanymal bloger Beibit Álibekovtiń atymen bailanysty iske qatysty. Lamborghini kóligimen adam qaǵyp óltirdi dep aiyptalǵan is boiynsha basty kýáger retinde Álibekovtiń jaýap berýi tiis bolatyn. Alaida ol sotqa onlain qosylyp, jaýap berdi. Bul sheshim advokattar men jábirlenýshilerdiń narazylyǵyn týǵyzdy.
Sot kýáger Beibit Álibekovtiń advokaty túsirgen onlain jaýap alý týraly ótinishti qabyldap, ony qanaǵattandyrdy. Buǵan deiin sot bul isti tek oflain formatta qaraý kerek degen qaýly shyǵarǵan bolatyn. Advokattar bul sheshimge narazy boldy. Olardyń aitýynsha, kýáger sotqa eki apta buryn shaqyrylǵanyn bilip, óz josparyn aldyn ala ózgerte alatyn edi.
Soǵan qaramastan, sot kýágerdiń Astanada ekenin aityp, onlain jaýap berýge múmkindik berdi. Alaida suraq qoiý kezinde Álibekovtiń Qaraǵandyda ekeni anyqtaldy – ol dál sol kúni ushyp barǵan. Advokat suraq qoiýdy jalǵastyrmaq bolǵanda, sýdia aiqailap, telefondy alyp qoiýdy talap etken.
Jábirlenýshi taraptyń advokaty Gaýhar Sálimbaeva suraqtaryn qoiǵan kezde de sot ony bólip, daýys kóterip, keiin múlde suraq qoiýǵa múmkindik bermegen. Bul áreketterge qarsy ekinshi advokat ta narazylyǵyn bildirmek bolǵanda, sýdia ekeýine de aiqailap, olarǵa qarsylyq bildirýge quqyqtary joq ekenin málimdegen.
Advokattar mundai málimdeme QR Qylmystyq-protsessýaldyq kodeksiniń 334-baby 2-bóligine qaishy ekenin atap ótti. Sot otyrysyndaǵy beitaraptyq pen ádildikke kúmán keltirgen bul áreketterden keiin marqumnyń ápkesi de, anasy da sot zalynan ketip qalǵan.
Advokattyń aitýynsha, sot barysynda sýdia kýágerdiń ornyna ózi jaýap berýge tyrysqan.
"Men kýágerdiń ózinen jaýap estigim keletinin aittym. Al sýdyń ornyna jaýap berý – bul ádildikke múldem jat qylyq", – deidi ol.
Senim joǵaldy
"Eger advokattarǵa suraq qoiýǵa múmkindik berilmese, olardy qorlap, olardyń qarsylyǵyn qabyldamasa, sot protsesiniń formaty tanymal blogerlerdiń yńǵaiyna qarai ózgerse, onda mundai protsesten ádilet kútýge bolmaidy", – deidi jábirlenýshi tarap.
Bul jaǵdaiǵa qatysty belgili jýrnalist Gúlbaný Ábenova pikir bildirdi.
"Ol blogerlikten tapqan milliardtaǵan tabysynan salyq tólemeidi. Oǵan bolady. Ol sotqa kelmei, dál sol kúni Qaraǵandyǵa ushyp kete alady. Oǵan bolady.. Sot protsesi tek oflain ótýi tiis. Biraq Álibekovke onlain bolady. Oǵan tipti advokattardyń suraqtaryna jaýap bermeýge de – sebebi sot advokattarǵa aiqailap, suraq qoiýǵa múmkindik bermeidi me? Sot milliarder Álibekovtiń qalaýyn oryndaityn daiashy siiaqty ma? Álde ol sotqa aqsha tólep qoiǵan ba?
Sonda qalai, elitaly kólik astynda qaza tapqan jigittiń ólimine qaramastan, bul adamǵa osyndai jaǵdai ne úshin jasalyp otyr? Bálkim, sot sońynda marqumnyń týystary Álibekovke kóliktiń jaldaý aqysyn da tóleýi tiis bolar? ", - deidi jýrnalist.
Eske salaiyq, qaiǵyly oqiǵa 2024 jyly qazanda bolǵan edi. Almaty oblysynda Lamborghini Aventador kóliginen sekirmek bolyp qaza tapqan Batyrhan Erjannyń ólimine qatysty qylmystyq is qozǵaldy. Rólde 45 jastaǵy er adam otyrǵan.
Aýyr jaraqattan jigit aýrýhanada qaza tapqan. Telearna málimetinshe, marqum Batyrhan Erjan TikTok jelisine alǵashqy videolaryn osydan eki jyl buryn sala bastapty. Ózi tap bolǵan túrli jaǵdaidy ázilmen jetkizip, keibir videosy segiz million ret qaralǵan. Biraq buǵan deiin jigittiń ekstremal kontent túsirgeni baiqalmaǵan.
Qazir qaiǵyly oqiǵa boiynsha politseiler tergeý júrgizdi.
"29 qazanda Aqsai aýylyndaǵy Sokol avtodromy aýmaǵynda beinerolik túsirý úshin triýk oryndaý kezinde 22 jastaǵy jas jigit abaisyzda 45 jastǵy júrgizýshi basqarǵan kóliktiń astyna tústi. Jigit aýdandyq aýrýhanaǵa jatqyzyldy. Al 30 qazanda esin jimastan kóz jumdy. Atalǵan derek boiynsha politsiia qylmystyq is qozǵady. Tergeý júrgizilip jatyr", - dedi Merýert Moriakova, Almaty oblysy PD resmi ókili.
Oqiǵa Senat depýtattaryna da málim boldy. Kóliktiń iesi ǵana emes, triýk jasaǵan adam da onyń saldary jaily aldyn ala oilaý kerek edi dep sanaidy.
"Kaskader dúniesi adam ómirine qaýipti. Sondyqtan da, rólge otyrǵannan keiin ushaq, tikushaq, mashina bolsyn, birinshi kezekte óz ómirine ózi jaýapty. Kólikti júrer aldynda tehnikalyq qaýipsizdigin qarap shyqty ma, tekserip shyqty ma degen siiaqty. Meniń oiymsha, bir jaqtan ǵana kináni izdeýge bolmaidy. Ol durys emes. Jan-jaqty qaraý kerek", - dedi Gennadii Shipovskih, Senat depýtaty.
Qaiǵyly oqiǵa bolǵan jer - «Sokol» avtodromy. Almatydan alshaq ornalasqan bul jerde kóliksúier qaýym jattyǵýlar ótkizip, sport jarystaryna qatysady. Avtodrom basshylyǵy bolǵan jaitqa pikir bildirýge qulyq tanytpaǵan.
